Թրամփի եւ Զելենսկու զրույցի շուրջ սկանդալը նոր թափ է ստանում

Նախօրեին հրապարակված իրազեկիչի զեկույցի համաձայն՝ ԱՄՆ նախագահ Դոնալդ Թրամփը, սեփական քաղաքական շահեր հետապնդելով, ոչ միայն չարաշահել է լիազորությունները՝ փորձելով հասնել 2020 թվականի ընտրություններին Ուկրաինայի միջամտությանը, այլեւ Սպիտակ տունը փորձել է «արգելափակել» նման վարքագծի ապացույցները, փոխանցում է Reuters-ը:

Իրազեկիչի բողոքը գաղտնազերծել եւ հրապարակել է Ներկայացուցիչների պալատի հետախուզության հարցերով կոմիտեն:

Բողոքը, մասնավորապես, վերաբերում է Թրամփի եւ Ուկրաինայի նախագահ Վլադիմիր Զելենսկու հուլիսի 25-ի հեռախոսային զրույցին, որի ժամանակ ԱՄՆ առաջնորդն իր գործընկերոջը կոչ է անում քննություն անցկացնել նախկին փոխնախագահ Ջո Բայդենի եւ նրա որդու՝ Հանթերի դեմ, որն աշխատել է ուկրաինական գազային ընկերությունում:

Բողոքի մասին տեղեկություններից հետո բռնկված սկանդալի հետեւանքով Ներկայացուցիչների պալատում դեմոկրատները հայտարարել են քննության մեկնարկի մասին Թրամփի նկատմամբ իմփիչմենթի պաշտոնական ընթացակարգի շրջանակում՝ նրան մեղադրելով արտասահմանյան օգնության դիմելու մեջ, որ հաջորդ տարվա ընտրությունների նախաշեմին Բայդենին վարկաբեկի:

Զեկույցում նշված է, որ Թրամփը գործել է սեփական քաղաքական շահերն առաջ մղելու համար, իսկ Սպիտակ տան պաշտոնյաները միջամտել են ապացույցներն առանձին համակարգ տեղափոխելու համար:

ԱՄՆ ազգային հետախուզության տնօրենի պաշտոնակատար Ջոզեֆ Մագուայերը հինգշաբթի կոմիտեում ելույթ ունենալիս ասել է, որ իրազեկիչն, իր կարծիքով, «ճիշտ է վարվել»: «Ես կարծում եմ, որ նա այդ ճանապարհին յուրաքանչյուր քայլը կատարելիս օրենքին է հետեւել»,- ասել է Մագուայերը:

Իրազեկիչի անձն առայժմ չի բացահայտվում:

Թրամփը հերքում է որեւիցե խախտում կատարելը:

Մերկացնողի հայտարարության մեջ նշված է, որ Թրամփն անձամբ է կարգադրել հուլիսի 25-ից կարճ ժամանակ առաջ դադարեցնել Ուկրաինային օգնությունը. այդ օրն էր տեղի ունեցել Ուկրաինայի նախագահի հետ զրույցը, փոխանցում է BBC-ն:

Ներկայացուցիչների պալատը նախօրեին հրապարակել է հայտարարության տեքստի կրճատ տարբերակը: Դրանում, մասնավորապես, նշված է.

«Իմ պաշտոնական պարտականությունների կատարման գործընթացում ես կառավարության մեծ թվով աշխատակիցներից տեղեկություն եմ ստացել, որ Միացյալ Նահանգների նախագահը իր իշխանական լիազորություններն օգտագործում է, որ խնդրի արտասահմանյան պետության մջամտությունը 2020-ի ամերիկյան ընտրություններին: Ի թիվս այլոց՝ միջամտությունը ներառում է արտասահմանյան պետության վրա ճնշման գործադրում, որ այն քննություն անցկացնի նախագահի տեղական գլխավոր մրցակիցներից մեկի դեմ: Նախագահի անձնական փաստաբան Ռուդոլֆ Ջուլիանին այս ջանքերի գործում կենտրոնական անձ է: Տպավոություն է ստեղծվում, որ դրա մեջ ներգրավված է նաեւ գլխավոր դատախազ Բարրը»:

Լսումների արդյունքում կոնգրեսականների հիմնական եզրահանգումն այն էր, որ Ջոզեֆ Մագուայերի միանգամայն հակասական գործողությունների պատճառով նախագահի մասին այդքան կարեւոր տեղեկությոնը կարող էր Կոնգրեսի ուշադրությունից վրիպել:

Նրանց կարծիքով՝ զանգի հետ կապված պատմությունը հայտնի է դարձել միայն ԱՄՆ հետախուզական ծառայությունների գլխավոր տեսուչ Մայքլ Աթքինսոնի աչալրջության շնորհիվ, որը հետախուզության հարցերով կոմիտե է ուղարկել 2 նամակ:

Ջոզեֆ Մագուայերը կոնգրեսականներին խոստացել է իր ուժերի սահմաններում ամեն ինչ անել՝ մերկացնողին եւ գլխավոր տեսուչ Մայքլ Աթքինսոնին պաշտպանելու նախագահի շրջապատի հնարավոր վրեժխնդրությունից:

Լսումների ավարտին Ներկայացուցիչների պալատի հետախուզության հարցերով կոմիտեի նախագահ Ադամ Շիֆը Ուկրաինայից ներողություն է խնդրել եւ ուկրաինացի գործընկերներին հավաստիացրել, որ ԱՄՆ-ն լիովին աջակցում է Ռոսաստանի դեմ նրանց պայքարին, կոռուպցիայի դեմ պայքարին եւ ժողովրդավարական հասարակություն կառուցելու ցանկությանը:

Շիֆի խոսքով՝ ԱՄՆ գործող նախագահն իր գործողություններով վարկաբեկել է ժողովրդավարություն հասկացությունը, բայց կայացած լսումներն այն փաստի լավագույն օրինակն են, որ ամերիկյան ժողովրդավարությունը ողջ է:

Ջո Բայդենը, որը 2020 թվականի նախագահական ընտրություններում Դեմոկրատական կուսակցությունից մասնակցող հիմնական թեկնածուներից մեկն է, իր դեմ Դոնալդ Թրամփի առաջադրած մեղադրանքներն անվանել է ընտրությունները «կեղծելու» փորձ: Հանրապետականների մեղադրանքները մեկնաբանելով՝ Բայդենը հայտարարել է. «Խոսքն իմ մասին չէ... Սա մարտավարություն է, որը նախագահն օգտագործում է՝ փորձելով կեղծել ընտրությունները, որպեսզի մենք չկենտրոնանանք կենսական նշանակություն ունեցող հարցերի վրա»,- հայտարարել է քաղաքական գործիչը: