Իսրայելի վարչապետը Լոնդոն է մեկնել, որպեսզի կոչ անի Ջոնսոնին դադարեցնել Իրանի հետ միջուկային բանակցությունները

Իսրայելի վարչապետ Բենյամին Նեթանյահուն մեկնել է Մեծ Բրիտանիայի մայրաքաղաք, որպեսզի կոչ անի երկրի վարչապետ Բորիս Ջոնսոնին դադարեցնել Իրանի հետ միջուկային բանակցությունները, գրում է The Guardian-ը:

Նեթանյահուն Ջոնսոնի հետ այսօր «հապճեպ կազմակերպված բանակցությունների» շրջանակում հանդիպում է ունենում, որտեղ նա, ակնկալվում է, Մեծ Բրիտանիային կոչ կանի հրաժարվել $15 մլրդ (£12 մլրդ) վարկ առաջարկելու ֆրանսիական պլանից, որով նախատեսվում է օգնել Իրանին նավթ վաճառելու հարցում:

Ջոնսոնը հանդիպում կունենա նաև ԱՄՆ փոխնախագահ Մայք Փենսի հետ, իսկ Նեթանյահուն օրվա ավարտին բանակցություններ կանցկացնի Պենտագոնի ղեկավար Մարկ Էսպերի հետ:

Իրանը և երեք եվրոպական երկրներ՝ Մեծ Բրիտանիան, Ֆրանսիան և Գերմանիան, բանակցություններ են վարում 2015 թվականի միջուկային համաձայնագրի փրկության շուրջ, որն «անդունդի» եզրին է հայտնվել անցյալ տարվա մայիսին միջուկային համաձայնագրից ԱՄՆ-ի դուրս գալուց հետո:

Լոնդոն ուղևորվելիս Նեթանյահուն հիշատակել էր Իրանի՝ ուրանի հարստացման վերսկսման նպատակով ցենտրիֆուգների մշակման գիտահետազոտական գործունեությունը:

«Այսօր առավոտյան մեզ տեղեկացրել են ևս մի խախտման մասին, Իրանի կողմից է՛լ ավելի մեծ արհամարհանքի մասին, այս անգամ՝ միջուկային զենք ստանալու նրա ձգտման մասին։ Սա համադրվում է միջազգային նավագնացության և տարածաշրջանում երկրների դեմ Իրանի ագրեսիվ գործողությունների, ինչպես նաև Իսրայել պետության վրա հարձակումներ գործելու անդադար փորձերի հետ»,-ասել էր Նեթանյահուն Լոնդոն մեկնելուց առաջ։

«Այժմ Իրանի հետ բանակցությունների ժամանակը չէ։ Այժմ Իրանի նկատմամբ ճնշումների ժամանակն է»,-հավելել էր նա։