ՄԻԵԴ-ը Ռուսաստանին պարտավորեցրել է 34 հազար եվրո բարոյական փոխհատուցում վճարել Մագնիտսկու հարազատներին

Մարդու իրավունքների եվրոպական դատարանը (ՄԻԵԴ) վճռել է, որ Ռուսաստանը խախտել է Սերգեյ Մագնիտսկու իրավունքները և այդ երկրին պարտավորեցրել է որպես բարոյական փոխհատուցում 34 հազար եվրո վճարել Մագնիտսկու հարազատներին, ասված է դատարանի մամուլի տեղեկագրում, որը ստացել է «ՌԻԱ Նովոստի»-ն:

«Դատարանը միաձայն որոշել է, որ տեղի է ունեցել Մարդու իրավունքների եվրոպական կոնվենցիայի 3-րդ հոդվածի (խոշտանգումների արգելում) խախտում՝ պարոն Մագնիտսկու կալանքի տակ պահման պայմանների հետ կապված»,- ասված է հաղորդագրության մեջ:

Ստրասբուրգի դատարանը երեքշաբթի հրապարակել է 10 և 7 տարի առաջ հարազատների (կնոջ և մոր) ներկայացրած «Մագնիտսկին և մյուսները Ռուսաստանի դեմ» բողոքի վերաբերյալ որոշումը:

Hermitage Capital Management խոշոր ներդրումային հիմնադրամի աշխատակից Սերգեյ Մագնիտսկին, որին Ռուսաստանի իրավապահ մարմինները մեղադրել էին հարկային խարդախությունների համար, մահացել է 2009 թվականի նոյեմբերին՝ «Матросская тишина» քննչական մեկուսարանում՝ շուրջ մեկ տարի անազատության մեջ գտնվելուց հետո: Նրա մահը լայն արձագանք է ստացել ինչպես Ռուսաստանում, այնպես էլ արտասահմանում:

Դատարանը նաև համարել է, որ «տեղի է ունեցել Կոնվենցիայի 5-րդ հոդվածի 3-րդ կետի խախտում (ազատության և անձեռնմխելիության իրավունք), Կոնվենցիայի 3-րդ հոդվածի խախտում` դաժան վերաբերմունքի ցուցաբերում բանտային հսկիչների կողմից և արդյունավետ հետաքննության բացակայություն»:

ՄԻԵԴ-ի որոշմամբ՝ «տեղի է ունեցել Կոնվենցիայի 2-րդ հոդվածի խախտում՝ կապված Մագնիտսկու կյանքի իրավունքը պաշտպանելու և նրա մահվան հանգամանքների արդյունավետ հետաքննություն ապահովելու իշխանությունների անկարողության հետ», ինչպես նաև նշել է Կոնվենցիայի 6-րդ հոդվածի 1-ին, 2-րդ կետերի խախտումների մասին (արդար դատաքննության իրավունք):

Դատարանի որոշմամբ՝ «պատասխանող կողմը՝ պետությունը, պարտավոր է երկրորդ և երրորդ կողմերին (Մագնիտսկու կնոջը և մորը) որոշումը ուժի մեջ մտնելուց հետո երեք ամսվա ընթացքում վճարել 34 000 եվրո (երեսունչորս հազար եվրո)»:

Միաժամանակ, դատարանը մերժել է դիմումատուների պահանջը՝ Կոնվենցիայի 46-րդ հոդվածով (պարտադիր ուժ և որոշումների կատարում)։