Մերկելը հայտնել է, թե որ պայմանի կատարման դեպքում Ռուսաստանը կարող է վերադառնալ «Մեծ յոթնյակի» կազմ

Գերմանիայի կանցլեր Անգելա Մերկելը հայտնել է, թե որ պայմանի կատարման դեպքում Ռուսաստանը կարող է վերադառնալ «Մեծ յոթնյակի» կազմ, գրում է gazeta.ru-ն:

Այդ մասին նա հայտարարել է G7-ի գագաթնաժողովում Ռուսաստանի և Ուկրաինայի թեմայի քննարկման ժամանակ:

«Ես Գերմանիայի անունից հստակ հասկացնել տվեցի, որ մենք մինսկյան գործընթացի կյանքի կոչման հարցում առաջընթացի կարիք ունենք»,- ասել է Մերկելը:

Նրա խոսքով՝ անհրաժեշտ է հենց այդ պայմանավորվածությունների կատարումը G7-ի կազմ Ռուսաստանի վերադարձի մասին խոսելու համար:

Մերկելն ընդգծել է, որ Գերմանիայի դիրքորոշման հետ համաձայնել են «Մեծ յոթնյակի» անդամ այլ երկրներ:

Մինսկյան արձանագրությունը ստորագրվել է 2014 թվականի սեպտեմբերի 5-ին Մինսկում, այն նախատեսում է կրակի դադարեցում Դոնեցկի և Լուգանսկի մարզերի տարածքում, որոնք Ուկրաինան համարում է իր տարածքը, իսկ այդ շրջանները հայտնել են իրենց անկախության մասին: