Գերմանիայում ջերմաստիճանային նոր ռեկորդ է գրանցվել

Գերմանիայի օդերևութաբանական ծառայությունը հաղորդել է երկրում գրանցված նոր ջերմաստիճանային ռեկորդի մասին. երկրի արևմուտքում սնդիկի սյունը +40,5-ի է հասել:

«Այսօր Գայլենկիրխեն քաղաքում գրանցված +40,5 աստիճանով ջերմաստիճանային նոր ռեկորդ է գրանցվել: Այն գերազանցել է 2015թ.-ի հուլիսի 5-ին Կիցինգեն քաղաքում գրանցված ջերմաստիճանային ռեկորդը (+40,3 աստիճան)»,- ասված է ծառայության թվիթերյան էջում:

Միաժամանակ նշվում է, որ ներկայիս ռեկորդը կարող է ընդամենը մեկ օր տևել. առաջիկայում ավելի սաստիկ շոգեր են սպասվում:

Օրերս Համաշխարհային օդերևութաբանական կազմակերպությունը հաղորդել էր, որ այս շաբաթ եվրոպական մի շարք երկրներում, այդ թվում՝ Գերմանիայում, Բելգիայում, Հոլանդիայում, Ֆրանսիայում և Շվեյցարիայում, մինչև 40 աստիճան ռեկորդային շոգեր են սպասվում:

Ֆանսիայի Բորդո քաղաքում երկուշաբթի + 41,2 աստիճան է գրանցվել, ինչը գերազանցել է 2003 թվականի ռեկորդը: Համաշխարհային օդերևութաբանական կազմակերպության ներկայացուցիչ Քլեր Նուլիսը հայտարարել է, որ նման ջերմային ալիքները «կլիմայի փոփոխության նշան են»: