Անհայտ անձինք թալանել են Ֆրանսիայի էկոնոմիկայի նախկին նախարարի բնակարանը՝ նրան ու տիկնոջը փակելով զուգարանում

Անհայտ անձինք թալանել են Ֆրանսիայի էկոնոմիկայի նախկին նախարար Թիերի Բրետոնի փարիզյան բնակարանը՝ վերջինիս տիկնոջ հետ փակելով զուգարանում և տանելով ավելի քան 55 հազար եվրոյի ապրանք: Այս մասին հայտնում է France Info պորտալը:

Աղբյուրի հաղորդմամբ՝ դեպքը տեղի է ունեցել հուլիսի 21-ի գիշերը:

Բրետոնը, որը ներկայում գլխավորում է Atos ընկերությունների խումբը, և նրա կինն արդեն պառկել էին քնելու, երբ երկու սևազգեստ անհայտ անձինք ներխուժել են նրանց բնակարան և սկսել ծեծել զույգին՝ հարվածներ հասցնելով, մասնավորապես, դեմքին:

Այնուհետև գողերը նախկին նախարարին սպառնացել են ատրճանակով՝ պահանջելով բացել չհրկիզվող պահարանը, որտեղ պահված են եղել նրանց զարդերը։ Բրետոնը ենթարկվել է, որից հետո տանտերերին և նրանց վարորդին փակել են զուգարանում:

Հանցագործներն իրենց գործն ավարտին հասցնելուց հետո արագ հեռացել են բնակարանից:

Գողացված իրերի ընդհանուր արժեքը, այդ թվում՝ ադամանդե ապարանջանի ու ոսկու ձուլակտորի, գնահատվում է ավելի քան 55 հազար եվրո:

Միջադեպի հետաքննությամբ զբաղվում են մայրաքաղաքի իրավապահ մարմինները:

Բաժանորդագրվեք Top-News.am-ին Telegram-ում