Ինչու է փախել Դուբայի կառավարչի կինը. պատճառը հայտնի է

Դուբայի շեյխ Մուհամեդ բեն Ռաշիդ ալ Մաքթումի կինը՝ արքայադուստր Հայան, ամիսներ շարունակ ծրագրել է իր փախուստը Լոնդոն այն բանից հետո, երբ պարզել է, որ ամուսինը ստել է ավագ դստեր բանտարկության եւ կտտանքների մասին։

45-ամյա արքայադուստր Հայա Բինտ ալ Հուսեյնը հեռացել է Դուբայից այն բանից հետո, երբ իմացել է, թե ինչպես է երկրի տիրակալը վերաբերվել դստերը՝ արքայադուստր Լաթիֆային։

Կարծիք կա, որ Հայային ասել են, որ աղջիկն այլ ամուսնությունից դարձել է դրամաշորթության զոհ եւ փրկության կարիք ունի, բայց ասում են, որ նա փորձել է փախչել ու նոր կյանք սկսել ԱՄՆ-ում։

Ինչպես գրում է Mail Online-ը՝ հղում կատարելով ընտանիքին մոտ աղբյուրին, արքայադուստր Հայան, վերջապես, իմացել է ճշմարտությունն այն մասին, թե ինչ է արել ամուսինը դստեր հետ, եւ վախեցել է, որ իր հետ նույնպես նույն բանը կպատահի։ «Դրանից հետո նա հարց է տվել իրեն, թե այդ որ հայրն աղջկան կփակի բանտում»։

33-ամյա Լաթիֆան փորձել է փախչել Դուբայից անցած տարի առագաստանավով, բայց նրան բռնել են հատուկջոկատայինները, եւ ներկայում նա բանտում է։

Աղբյուրը տեղեկացրել է, որ Հայան սկզբում հավատացել է ամուսնու վարկածին, բայց հետո իմացել է, որ Լաթիֆան կտտանքների է ենթարկվել եւ բանտարկվել, ինչպես նաեւ բռնի վերադարձվել է Դուբայ։ Հայան կասկածել է ամուսնու վարկածին այն բանից հետո, երբ խնդրել է ընկերուհուն՝ Իռլանդիայի նախկին նախագահ Մերի Ռոբինսոնին, գալ Դուբայ եւ հանդիպել Լաթիֆային անցած տարվա դեկտեմբերին։

Ընտանիքի բարեկամի խոսքով՝ Հայան սկսել է հարցուփորձ անել ոչ միայն Լաթիֆայի Դուբայ վերադառնալու, այլ նաեւ այն մասին, թե ինչպես են նրա հետ վարվել, երբ նա ավելի երիտասարդ է եղել։ «Արքայադուստրը խելացի կին է, եւ նա կհասկանար, որ նրա ամուսնու մարդիկ թաքցրել են ճշմարտությունն այն մասին, ինչ տեղի է ունեցել»։

Հիշեցնենք, որ հուլիսի 30-ին Լոնդոնի ընտանեկան գործերով դատարանում սկսվելու է արքայադստեր եւ Դուբայի կառավարչի ապահարզանի դատավարությունը։