«Թիկնապահի հետ մտերմությունը շատ կասկածելի էր». ինչու է Դուբայի շեյխի կինը վախեցած փախել ամուսնուց

Դուբայի շեյխ Մոհամեդ բին Ռաշիդ ալ Մաքթումի վեցերորդ կինը՝ արքայադուստր Հայա բինթ ալ Հուսեյնը, որը Հորդանանի հանգուցյալ թագավորի դուստրն է, ստիպված է եղել փախչել միլիարդատեր ամուսնուց, երբ վերջինիս մոտ լուրջ կասկածներ են առաջացել կնոջ և նրա բրիտանացի թիկնապահի «չափից շատ մտերմության» վերաբերյալ:

Ինչպես նշում է The Times-ը, այժմ 69-ամյա շեյխը Լոնդոնի Բարձր դատարանում հայց է ներկայացրել 45-ամյա արքայադստեր դեմ:

Կնոջ ընկերների պատմելով՝ Հայան Դուբայի իրենց պալատից փախել է, քանի որ ամուսնու մոտ կասկածներ առաջանալուց հետո վախեցել է սեփական կյանքի, ինչպես նաև մանկահասակ երկու երեխաների անվտանգության համար: Այնուհանդերձ՝ հայտնի չէ՝ արդյոք այդ կասկածներն արդարացի են:

Պարբերականի տվյալներով՝ Հայան ճոխ նվերներ է արել իր թիկնապահին, ինչը թագավորական ընտանիքի այլ անդամների կողմից դիտարկվել է որպես անպատշաճ մտերմություն:

 Հատկանշական է, որ Դուբայի շեյխի ընտանեկան հարաբերություններում ճգնաժամի ֆոնին նրա հետ առնչություն ունեցող ինստագրամյան էջերից մեկում մի քանի օր առաջ արվել է հետևյալ հրապարակումը.«Դո՛ւ՝ դավաճա՛ն, դավաճանեցիր այն անգին վստահությունը, քո խաղն այլևս բացահայտված է»:

Նշվում է, որ ներկայում արքայադուստր Հայան իր երկու երեխաների հետ թաքնվում է Լոնդոնում՝ Քենսինգտոնյան պալատից ոչ հեռու գտնվող իր ճոխ առանձնատանը: Ըստ որոշ աղբյուրների՝ նա Դուբայից իր փախուստն ամենայն մանրամասնությամբ ծրագրել էր վերջին մի քանի ամսվա ընթացքում: Սկզբում նա Դուբայից Բեռլին է փախել, իսկ հետո Լոնդոն տեղափոխվել՝ իր հետ վերցնելով ավելի քան 60 մլն դոլար:

Մինչդեռ նրա ամուսինը, որն աշխարհի ամենահարուստ և ազդեցիկ մարդկանցից է, փորձում է դատարանի միջոցով հետ ստանալ իր երեխաներին: Իրավիճակը բարդացնում է այն հանգամանքը, որ թե՛ ամուսինը, թե՛ կինը շատ մտերիմ են Մեծ Բրիտանիայի թագավորական ընտանիքի, հատկապես՝ Էլիզաբեթ 2-րդի հետ և չի բացառվում, որ նրանք կարող են ներքաշվել աղմկահարույց ամուսնալուծության գործընթացում:

Այս գործով առաջին դատական նիստը կայանալու է հուլիսի 30-ին:

Բաժանորդագրվեք Top-News.am-ին Telegram-ում