Օմանը հերքում է Իսրայելի հետ դիվանագիտական հարաբերությունների հաստատումը

Օմանը հերքում է Իսրայելի հետ դիվանագիտական հարաբերությունների հաստատումը, հաղորդում է AFP-ը:

Օմանի ԱԳՆ-ը Twitter-ում գրել է, որ «սուլթանության եւ Իսրայելի միջեւ դիվանագիտական հարաբերությունների հաստատման մասին հաղորդագրությունները» չեն համապատասխանում իրականությանը:

«Սուլթանությունը ձգտում է դիվանագիտական պայմաններ ստեղծել բոլոր միջազգային եւ տարածաշրջանային կողմերի հետ կապերի վերականգնման ու Պաղեստինի եւ Իսրայելի միջեւ խաղաղության հասնելու համար աշխատանքների համար, ինչը կհանգեցնի Պաղեստինի անկախ պետության ստեղծմանը»,- ասվում է հայտարարության մեջ:

Հիշեցնենք, որ երեկ իսրայելական հետախուզական «Մոսսադ» գործակալության ղեկավար Յոսսի Կոենը հայտարարել է, որ Իսրայելը «պաշտոնական հարաբերություններ» է հաստատում Օմանի հետ:

«Վերջերս հայտարարվեց Օմանի հետ պաշտոնական հարաբերությունների վերսկսման մասին: Դա առավել լայն գաղտնի ջանքերի միայն տեսանելի մասն է: Մենք խաղաղության մասին պաշտոնական համաձայնագիր դեռեւս չունենք, սակայն արդեն կան ընդհանուր շահեր, լայն համագործակցություն եւ կապի բաց ալիքներ»,- ասել էր նա:

Իսրայելն ու Օմանը համաձայնել են առեւտրային ներկայացուցչություն բացել 1990-ականներին, սակայն 2000 թվականին Պարսից ծոցի սուլթանությունը փակեց դրանք պաղեստինյան երկրորդ ինտիֆադայից հետո: Հոկտեմբերին Իսրայելի վարչապետ Բենյամին Նեթանյահուն անսպասելի բանակցություններ սկսեց Օմանի սուլթանի հետ: Այդ քայլերը պաղեստինցիների մոտ մտավախություններ առաջացրեցին:

Անցած շաբաթ Օմանը հայտարարեց, որ Պաղեստինում դեսպանատուն կբացի՝ ի աջակցություն պաղեստնցի ժողովրդին: