Չինաստանում սկսել է մեծ արագությամբ վաճառվել G20-ի ժամանակ Պուտինի օգտագործած թերմոս-բաժակի կրկնօրինակը (լուսանկար)

Օրերս «Մեծ քսանյակի»՝ Ճապոնիայի Օսակա քաղաքում տեղի ունեցած գագաթնաժողովից հետո Չինաստանում առցանց վաճառքի խոշորագույն՝ Taobao հարթակում սկսել է մեծ արագությամբ վաճառվել թերմոս-բաժակ, որը շատ նման է գագաթնաժողովի մասնակիցների համատեղ ընթրիքի ժամանակ ՌԴ նախագահ Վլադիմիր Պուտինի օգտագործած թերմոս-բաժակին, որով վերջինս թեյ էր խմում: Այս մասին հաղորդում է Global Times պարբերականը:

Չինաստանում շատ առցանց խանութներ սկսել են Ռուսաստանի ոսկեգույն զինանշանով սպիտակ թերմոս-բաժակի պատվերներ ստանալ, ընդ որում՝ ակնկալվում է, որ բաժակի կրկնօրինակը գնորդներին կառաքվի երկու շաբաթվա ընթացքում: Դրա գինը տատանվում է 7-30 դոլարի սահմաններում:

Նշվում է, որ բաժակը հայտնի է դարձել այն բանից հետո, երբ չինական լրատվամիջոցները գրել են դրա մասին: Առցանց խանութներից մեկը պատմել է Global Times-ին, որ իրենք վաճառում են նմանատիպ «բարձրակարգ» բաժակ, որը «լավ է առողջության համար»:

Պարբերականը հավելում է, որ Չինաստանում Պուտինին հարգանքով են վերաբերում. այդ երկրի բնակիչները գնահատում են ՌԴ նախագահի՝ սպորտի և դաշնամուր նվագելու նկատմամբ սերը: