Ռուսաստանը Թրամփին 2020թ. Մոսկվա է հրավիրել. ԱՄՆ նախագահը դրական է արձագանքել

Ռուսաստանը Միացյալ Նահանգների նախագահ Դոնալդ Թրամփին հրավիրել է Մոսկվա՝ մասնակցելու Հայրենական մեծ պատերազմում ԽՍՀՄ տարած հաղթանակի 75-ամյակին նվիրված հանդիսավոր տոնակատարությանը:

Ինչպես նշում է Russia Today-ը, այս մասին հայտնել է ՌԴ նախագահի օգնական Յուրի Ուշակովը:

«Մենք ԱՄՆ նախագահին հրավիրել ենք հաջորդ տարվա մայիսի 9-ին Հայրենական մեծ պատերազմում տարած հաղթանակի 75-ամյակին նվիրված տոնակատարությանը»,-«Ռոսիա 24»-ի եթերում ասել է Ուշակովը:

Նա հավելել է, որ Թրամփը դրական արձագանք է տվել:

Ավելի վաղ ՌԴ նախագահի մամուլի խոսնակ Դմիտրի Պեսկովն ասել էր, որ 2020թ. նշվելիք տարեդարձն իրոք առանձնահատուկ է լինելու:

Հիշեցնենք, որ ճապոնական Օսակայում «Մեծ քսանյակ»-ի գագաթնաժողովի շրջանակում կայացել է Ռուսաստանի Դաշնության նախագահ Վլադիմիր Պուտինի և նրա ամերիկացի գործընկեր Դոնալդ Թրամփի հանդիպումը: Երկու տերությունների ղեկավարների միջև բանակցությունները տևել են մեկուկես ժամ:

Հանդիպման մեկնարկից առաջ ԱՄՆ նախագահն ընդգծել էր, որ հրաշալի արդյունքներ է ակնկալում այս հանդիպումից: Հատկանշական է, որ հանդիպման ժամանակ Թրամփը կատակել է՝ ասելով Պուտինին, որ նա «չմիջամտի ամերիկյան ընտրություններին»:

Հատկանշական է, որ հանդիպմանն առաջինը ներկայացել է Թրամփը, մինչդեռ Պուտինը փոքր-ինչ ուշացել է:

Նշենք, որ վերջին երեք տարում սա երկու ղեկավարների երրորդ հանդիպումն է:

ԲԱԺԱՆՈՐԴԱԳՐՎԵՔ TOP-NEWS.AM-ԻՆ TELEGRAM-ում