Բորիս Ջոնսոնը մերժել է Թրամփի՝ հանդիպման առաջարկը

ԱՄՆ նախագահ Դոնալդ Թրամփը որոշել է Բրիտանիայում չսահմանափակվել պաշտոնական հանդիպումներով։ Ինչպես տեղեկացնում է AP-ը, Թրամփը զանգահարել է վարչապետի թեկնածու Բորիս Ջոնսոնին եւ առաջարկել հանդիպել։

Ջոնսոնը բրեքսիթի կողմնակից է, որը համարում է, որ Բրիտանիան պետք է դուրս գա ԵՄ-ից մինչեւ հոկտեմբերի 31-ը, անգամ եթե չհաջողվի հասնել Բրյուսելի հետ համաձայնության։

Մինչեւ Air Force One-ի՝ բրիտանական հողում վայրէջք կատարելը Թրամփը գովեստով էր խոսել բրեքսիթի կողմնակից Բորիս Ջոնսոնի եւ Նայջլ Ֆարաջի մասին։

Երեքշաբթի Թրամփը զանգահարել է Ջոնսոնին եւ առաջարկել հանդիպել, բայց Ջոնսոնը մերժել է հրավերը, քանի որ նա պետք է կենտրոնանա Պահպանողական կուսակցության օրենսդիրների հետ հանդիպման համար, որոնք պետք է ընտրեն ապագա վարչապետին։ Նախագահը հասկացել է իրավիճակը եւ ասել, որ հույս ունի բաց թողածը լրացնել ավելի ուշ, նշել է աղբյուրը։ Նրա խոսքով՝ նրանց խոսակցությունը տեւել է մոտ 20 րոպե։

Այցի նախօրեին Թրամփը գովել էր Ջոնսոնին՝ ասելով, որ նա կդառնա «շատ լավ» վարչապետ, եւ խորհուրդ էր տվել շեշտակի դուրս գալ Եվրամիությունից հոկտեմբերի 31-ին՝ համաձայնությամբ կամ առանց համաձայնության։