YouTube-ի օգտատերն ազատազրկման է դատապարտվել 2 տարի առաջ հրապարակած կատակ-տեսանյութի պատճառով

YouTube տեսահոսթինգի օգտատերերից մեկը, որը կատակել էր անօթևան մարդու հետ՝ վերջինիս ատամի մածուկով լցոնված Oreo թխվածքաբլիթ հյուրասիրելով, 15 ամսվա ազատազրկման է դատապարտվել:

Ինչպես տեղեկացնում է BBC News-ը, Բարսելոնայի դատարանը վճռել է, որ Կանգուա Ռեն (Kanghua Ren) անունով հայտնի իսպանացի բլոգերը «խախտել է բարոյական անձեռնմխելիությունը» 2017-ին նկարահանած յութուբյան կատակի ժամանակ:

Դատարանը նաև վճռել է փակել նրա յութուբյան ալիքը, վերջինս իրավունք չի ունենա տեսանյութեր հրապարակել մինչև 2024 թվականը:

Բացի այդ, նա պարտավորվում է իր կատակի զոհին 20 000 եվրո վճարել՝ որպես փոխհատուցում:

Աղբյուրը նշում է, որ Ռենը դժվար թե բանտում հայտնվի, քանի որ իսպանական դատարանները սովորաբար չեղարկում են բանտարկումը մինչև երկու տարի ժամկետով ազատազրկման դեպքում, եթե դա առաջին դեպքն է:

Անօթևանին իսպանական լրատվամիջոցներում նշում են Գեորգե Լ (Gheorge L) անունով. վերջինս ռումինացի է, որն անտառապահ է եղել նախքան Բարսելոնա տեղափոխվելը: