Սաակաշվիլին նշել է, թե երբ է վերադառնալու Վրաստան

Վրաստանի նախկին նախագահ, Ուկրաինայի Օդեսա մարզի նախկին նահանգապետ Միխեիլ Սաակաշվիլին հայտարարել է, որ մտադիր է մեկ կամ երեք ամսից վերադառնալ Վրաստան:

«Մեկ կամ երեք ամիս», - РИА Новости-ի փոխանցմամբ՝ ասել է Սաակաշվիլին ուկրաինական ալիքի լրատվական հաղորդման շրջանակներում տված հարցազրույցի ընթացքում:

Սաակաշվիլին Վրաստանից հեռացել է 2013 թվականին: Երկրում նրա դեմ մի շարք քրեական գործեր են հարուցվել, որոնցից մի քանիսով վերջինս ազատազրկման է դատապարտվել: 2015-ի գարնանը Սաակաշվիլին մուտք է գործել ուկրաինական քաղաքականություն, սակայն 2016-ին Ուկրաինայի ղեկավար Պորոշենկոն հեռացրել է վերջինիս զբաղեցրած պաշտոնից և ավելի ուշ զրկել ուկրաինական քաղաքացիությունից: Նրա մուտքը երկիր արգելվել էր մինչև 2021 թվականը:

Մայիսի 28-ին Ուկրաինայի նոր նախագահ Վլադիմիր Զելենսկին վերադարձրել է Սաակաշվիլիի քաղաքացիությունը, որից հետո գործիչը վերադարձել է Կիև: