ԱՄՆ-ը սպառնացել է Հնդկաստանին ռուսական S-400 համակարգեր ձեռքբերելու որոշման համար

ԱՄՆ-ը լուրջ հետևանքներով է սպառնացել Հնդկաստանին, եթե վերջինը գնի ռուսական S-400 զենիթահրթիռային համակարգեր: Այդ մասին Lenta.ru-ի փոխանցմամբ՝ հայտնել է The Times Of India-ն:

«Հնդկաստանի կողմից S-400 համակարգերի ձեռքբերումը կարող է խոչընդոտել ԱՄՆ-ի և Հնդկաստանի միջև հետագա համագործակցությունը բարձր տեխնոլոգիաների ոլորտում»,- ըստ աղբյուրի՝ հայտարարել են ԱՄՆ Պետդեպարտամենտից:

Ավելի վաղ հաղորդվել էր, որ Հնդկաստանը որոշել է ձեռքբերել ռուսական S-400 համակարգեր, քանի որ նման զենք ունի նաև Չինաստանը:

ՀՕՊ համակարգերի մատակարարման պայմանագիրը կնքվել էր 2018 թ. հոկտեմբերի 5-ին Ռուսաստանի Դաշնության նախագահ Վլադիմիր Պուտինի՝ Հնդկաստան կատարած այցի ընթացքում: S-400 համակարգերը Հնդկաստան պետք է հասնեին 5 տարում: Ավելի ուշ, ԱՄՆ նախագահ Դոնալդ Թրամփը խոստացել էր Դելիի այդ քայլն անպատասխան չթողնել:

Հիշեցնենք, որ S-400 համակարգերի ձեռքբերման առնչությամբ ԱՄՆ-ը պատժամիջոցներով է սպառնում նաև Թուրքիային: