Պենտագոնի ղեկավարը հայտարարել է, որ Huawei-ը սերտորեն կապված է Չինաստանի կառավարության հետ

ԱՄՆ պաշտպանության նախարարի պաշտոնակատար Պատրիկ Շանահանը հայտարարել է, որ Huawei ընկերությունը սերտորեն կապված է Չինաստանի կառավարության հետ: Այդ մասին նա հայտարարել է Սինգապուրում կայացած Ասիայի և Խաղաղօվկիանոսյան տարածաշրջանի անվտանգության հարցերով Shangri-La Dialogue միջազգային խորհրդաժողովի ընթացքում:

«Բացի այն, որ Huawei-ը սերտորեն կապված է Չինաստանի կառավարության հետ, այդ երկրում նաև բիզնեսը փոխկապակցված է ռազմական ոլորտի հետ»,- ТАСС-ի փոխանցմամբ՝ ասել է Շանահանը՝ հավելելով, որ Վաշինգտոնը «տնտեսական անվտանգությունը համարում է ազգային անվտանգության անբաժանելի մաս:

Սպիտակ տան վարչակազմի կողմից Huawei ընկերությանն առնչվող հայտարարությունները Պեկինում համարում են «ԱՄՆ-ի քաղաքացիներին մոլորության մեջ գցելու փորձ»: Չինաստանի իշխանությունները կարծում են, որ «ԱՄՆ քաղաքացիները մեծ կասկածանքով են վերաբերվում երկրի իշխանությունների գործողություններին, որոնք առևտրային և տեխնոլոգիական պատերազմ են սկսել»: