Եվրահանձնաժողովը կարող է 4 մլրդ դոլարով տուգանել Իտալիային

Եվրահանձնաժողովը հաջորդ շաբաթ կարող է Իտալիայի դեմ կարգապահական բնույթի վարույթ սկսել այն փաստի առնչությամբ, որ երկիրը չի կարողացել բավարար կերպով կրճատել պետական պարտքի մակարդակը, գրում է Bloomberg գործակալությունը:

Հունիսի 5-ին Եվրամիության երկրների բուջետային կանոնավոր մշտադիտարկման շրջանակում ներկայացվելիք հանձնարարականներն այդ երկարատև ու բարդ գործընթացի առաջին քայլը կլինեն:

Եվրամիության օրենքների համաձայն՝ երկրների բյուջեի պակասուրդը չպետք է գերազանցի ՀՆԱ-ի 3, իսկ պետական պարտքը՝ ՀՆԱ-ի 60 տոկոսը: Այն երկրները, որոնց պարտքը գերազանցում է այդ մակարդակը, պարտավորվում են սահմանված ժամկետում կրճատել այն:

Իտալիայի պետական պարտքը երկրի ՀՆԱ-ի 132%-ն է կազմում, ինչն ավելի քան երկու անգամ գերազանցում է սահմանված չափը: Եվրահանձնաժողովը կարծում է, որ պարտքի կրճատման համար սահմանված տեմպերը բավարար չեն:

ԵՄ-ի երկրների ֆինանսների նախարարները ստիպված կլինեն հաստատել չափից շատ պակասուրդի գործընթաց (Excessive Deficit Procedure) սկսելու մասին հանձնարարականը, ինչը ՀՆԱ-ի 0,2%-ի չափով տուգանք է նախատեսում: Տվյալ դեպքում դա հավասար է 4 մլրդ դոլարի: Հայտնի է, որ մինչ այժմ ԵՄ ոչ մի երկիր տվյալ գործընթացի համաձայն չի տուգանվել: