100-ամյա կինը քաղաքային խորհրդի պատգամավոր է ընտրվել

Գերմանիայի Կիրխգայմբոլանդեն քաղաքում 100-ամյա կինը դարձել է տեղական խորհրդի պատգամավոր: Այս մասին հայտնում է RP Online-ը:

Առաջիկայում Լիզել Հայզը կգլխավորի «Մենք Կիբոյի համար» խմբակցությունը տեղական խորհրդում: Իր նախընտրական ծրագրում կինը նշել է, որ քաղաքի լողավազանը 8 տարի փակված մնալուց հետո կվերաբացվի:

Վերջին ամիսների ընթացքում Լիզելը ԶԼՄ-ների ուշադրության կենտրոնում էր: Կուսակցական ցուցակում նա 20-րդն է եղել, բայց կարողացել է իր մրցակիցներից շատ ձայներ հավաքել:

Չնայած իր տարիքին՝ կինը հոգեպես և ֆիզիկապես շատ լավ վիճակում է, և ամեն շաբաթ այցելում է եկեղեցի՝ պատարագի:

Լիզել Հայզը նշել է, որ երբ անհրաժեշտ է քաղաքական ու հասարակական հարցերում ներդրում ունենալ, ապա այդ ժամանակ տարիքը չի կարող խանգարել: Նա նաև կողմակից է Էմանուել Մակրոնի այն գաղափարին, որ եվրոպական երկրները պետք է միասնական լինեն:

«Իսկ Brexit պաշտոնյաներին թող ուղարկեն Լուսին»,- ասել է 100-ամյա կինը: