Լիտվայում մեկնարկել են նախագահական ընտրությունները. զուգահեռ նաև 2 հանրաքվե է ընթանում

Լիտվայում մեկնարկել են անկախությունից ի վեր 7-րդ նախագահական ընտրությունները: Ընտրություններին զուգահեռ երկրում անց է կացվում երկու հանրաքվե՝ երկքաղաքացիության օրենքի ընդունման և պատգամավորական կորպուսը 15%-ով կրճատելու վերաբերյալ, գրում է ՏԱՍՍ գործակալությունը:

Երկրում տեղի ժամանակով 07:00-ին բացվել են երկրի շուրջ 2000 ընտրատեղամասերը, որոնք բաց կմնան մինչև 20:00-ն: Ընտրություններին քվեարկելու իրավունք է ստացել 2,8 մլն քաղաքացուց 2,5 միլիոնը: Նշվում է, որ ընտրողների թիվը ժողովրդագրական ոչ բարենպաստ իրավիճակով պայմանավորված 2014թ.-ի նախագահական ընտրությունների համեմատ կրճատվել է 69000-ով:

Երկրի նախագահի պաշտոնին հավակնում է 9 թեկնածու: Սոցհարցումների տվյալներով և փորձագետների կարծիքով՝ ֆավորիտներ են համարվում 54-ամյա տնտեսագետ Գիտանաս Նաուսեդան, ֆինանսների նախկին նախարար, 44-ամյա Ինգրիդա Շիմոնիտեն և 48-ամյա վարչապետ Սալյուս Սկվերնյալիսը:

Լիտվայի գործող նախագահ Դալյա Գրիբանուսկայտեն երկրորդ անգամ է պաշտոնավարում և երրորդ պաշտոնավարմանը հավակնելու իրավունք չունի:

Նախագահակաան ընտրությունների հաղթող կճանաչվի այն թեկնածուն, որը կստանա քվեների 50%-ից ավելին, իսկ եթե թեկնածուներից ոչ մեկին չհաջողվի նման արդյունք գրանցել, մեկ շաբաթ անց անց կկացվի ընտրությունների երկրորդ փուլը: