Մեկ ուղղությամբ շարժվելու կարողությունը՝ ոչ ի հաշիվ մյուսի, ամենամեծ մարտահրավերն է մեր արտաքին քաղաքականությունում. Զ. Մնացականյան

ՀՀ արտաքին գործերի նախարար Զոհրաբ Մնացականյանն անդրադարձել է Վրաստանի, Իրանի, ԱՄՆ-ի, Չինաստանի, ՌԴ-ի հետ Հայաստանի հարաբերություններին, փոխգործակցությանը, խոսել է «Մեկ գոտի, մեկ ճանապարհ» համաժողովին բարձր մակարդակով ՀՀ-ի չմասնակցելու պատճառների մասին:

«Մենք, փոքր երկիր լինելով, փորձում ենք կառուցել մեր օրակարգը մեր ազգային շահին համապատասխան և փորձում ենք դիրքավորել այնպես, որ բալանսը պահպանենք: Մեր մոտեցումը եղել է այն, որ մենք չափազանց կարևոր օրակարգ ունենք այս ուղղություններով: Եվ մեկ ուղղությամբ շարժվելու կարողությունը՝ ոչ ի հաշիվ մյուսի, ամենամեծ մարտահրավերն է մեր արտաքին քաղաքականությունում: Փորձում ենք ավելի ներգրավված լինել այս ուղղություններում` ճիշտ հաշվարկված քաղաքականություն վարելով, որպեսզի կարողանանք ողջամիտ առաջ շարժվել և ապահովել մեր ազգային շահերը»,-նշեց նախարարը:

-Վրաստանի և Իրանի հետ հարաբերություններում զարգացումների ի՞նչ ակնկալիքներ ունենք մոտ ապագայում:

-Ինչպես որ արտահայտված է մեր կառավարության ծրագրում, մեր անմիջական հարևանները` Վրաստանը և Իրանը, ռազմավարական առումով եղել ու մնում են մեր կարևոր ուղղություններից մեկը: Մենք մեր ծրագրում ձևավորել ենք նաև այն մոտեցումը, որ փորձելու ենք զերծ պահել այդ հարաբերությունները տարբեր աշխարհաքաղաքական ազդեցություններից: Սա է մեր հարբերությունների հիմքում դրված: Գիտեք, որ կա բավական հետաքրքիր և արդյունավետ դրական դինամիկա մեր վրացի գործընկերների հետ: Բավական երևելի աշխատանք է կա նաև հարավային ուղղությամբ: Եվ այդ ամենը, իհարկե, բավական բարդ գործառույթ է այն առումով, որ պետք է համագործակցել և զարգացնել այն, ինչն անմիջապես բխում է մեր ազգային շահերից` միևնույն ժամանակ համադրելով դա աշխարհաքաղաքական տարբեր զարգացումների հետ և կարողանալով գտնել ձևաչափեր` ինչպես զերծ պահել այդ հարաբերությունները նման ճնշումներից: Այս տարվա ընթացքում, կարծում եմ, որ ունենք բավական դրական բնականոն հարաբերությունների զարգացումներ: Բնական է, որ երկկողմ հարաբերություններում կան տարբեր հարցեր: Ամեն ինչ չէ, որ կարող է հարթ ընթանալ և լինել առանց խնդիրների: Սակայն մեր աշխատանքի միջոցով մենք կարողացել ենք և ունենք բավականին լավ ձևաչափեր և խողովակներ միմյանց հետ աշխատելու համար:

-Ի՞նչ զարգացումներ կարող ենք ակնկալել Հայաստան-ԱՄՆ, ՀՀ-ՉԻնաստան, ՀՀ-ՌԴ հարաբերություններից: Ինչո՞ւ Հայաստանը չմասնակցեց «Մեկ գոտի, մեկ ճանապարհ» համաժողովին:

-Գիտեք, որ Ռուսաստանի հետ ունենք հարաբերությունների չափազանց լայն օրակարգ: Նշեցիք «Մեկ գոտի, մեկ ճանապարհ» համաժողովի մասին: Բնապահպանության նախարարը մասնակցել է դրան: Իսկ ամենաբարձր մակարդակով, վստահ եմ, որ սա վերջինը չէ և ինչ-որ չափով նույնպես մենք ադապտացնում ենք մեր գերակայություններն այս նոր զարգացումներին: Եվ վստահ եմ, որ մենք առաջին հերթին այնտեղ բավական գիտակցված քաղաքականություն ձևավորելու միջոց ունենք: Նշեցիք երեք հիմնական ուղղություններ, բայց կան նաև այլ ուղղություններ նույնպես: Եվ մենք, փոքր երկիր լինելով, փորձում ենք կառուցել մեր օրակարգը մեր ազգային շահին համապատասխան և փորձում ենք դիրքավորել այնպես, որ բալանսը պահպանենք: Մեր մոտեցումը եղել է այն, որ մենք չափազանց կարևոր օրակարգ ունենք այս ուղղություններով: Եվ մեկ ուղղությամբ շարժվելու կարողությունը՝ ոչ ի հաշիվ մյուսի, ամենամեծ մարտահրավերն է մեր արտաքին քաղաքականությունում: Փորձում ենք ավելի ներգրավված լինել այս ուղղություններում` ճիշտ հաշվարկված քաղաքականություն վարելով, որպեսզի կարողանանք ողջամիտ առաջ շարժվել և ապահովել մեր ազգային շահերը: