Տուգանքներ, ազատազրկում և անգամ մահապատիժ. ինչ է արգելվում զբոսաշրջիկներին անել հայտնի լողափերում և առողջարաններում

Որոշ երկրներում 2019-ին զբոսաշրջիկները կարող են բախվել նոր օրենքների և սահմանափակումների, որոնց չենթարկվելու պարագայում խիստ պատիժ է նախատեսված՝ մեծ տուգանքներ, ազատազրկում և նույնիսկ մահապատիժ:

Ինչպես հայտնում է РИА Новости-ն, իտալական Կապրի կղզու իշխանությունները մայիսի 1-ից արգելել են մեկանգամյա օգտագործման սպասքի, տոպրակների և շշերի օգտագործումը: Օրենքը խախտողներին 500 եվրո տուգանք է սպառնում:

Եգիպտական Հուրգադա և Մարսա-Ալամ առողջարաններում պլաստիկե սպասքի օգտագործման համար տուգանքներ են սպառնում նաև խանութների, դեղատների և ռեստորանների տերերին:

Իսպանական Մայորկա և Իբիսա կղզիներում ամռանն արգելվում է ծխել լողափում:

Փարիզում հետիոտն գոտիներում էլեկտրական սկուտերով և նման սարքերով երթևեկելու համար սեպտեմբերից տուգանք է գործում 135 եվրոյի չափով:

Թաիլանդի Փհուկետ կղզում արգելվում է սելֆի անել օդ բարձրացող կամ վայրէջք կատարող ինքնաթիռի ֆոնին: