Զիմբաբվեի նախկին նախագահի գյուղտեխնիկան եւ լիմուզինը աճուրդի կդնեն՝ պարտքերը մարելու համար

Զիմբաբվեի նախկին նախագահ Ռոբերտ Մուգաբեի կաթի ֆերմայի գյուղատնտեսական տրակտորները, պիկապները եւ կոմբայնները կվաճառեն աճուրդում, որպեսզի մարեն պարտքերը՝ հայտնում է AFP-ը։

Մուգաբեն, որը Զիմբաբվեն ղեկավարել է 37 տարի, ունի մի քանի ֆերմա՝ չնայած օրենքներին, որոնց համաձայն՝ մասնավոր անձը կարող է միայն մեկ ֆերմա ունենալ։

Մուգաբեն տապալվել էր 2017թ․ տեղի ունեցած զինվորական կարճատեւ հեղաշրջման հետեւանքով։

Մուգաբեն եւ նրա կինը՝ Գրեյսը, մեղադրվել են նրանում, որ մանր հողատերերին ստիպել են լքել հողը, որպեսզի ստեղծեն Գուշունգո կալվածքը՝ Մազովում, որտեղ զույգը ստեղծել է եկամտաբեր ֆերմերային բիզնես։

Աճուրդի հանված ավելի քան 40 ավտոմեքենաներից չորսը Toyota Hilux պիկապ է, երեքը ձիեր տեղափոխող Scania բեռնատարներ եւ C-դասի Mercedes-Benz լիմուզին։

Վաճառվում են նաեւ Massey Ferguson տրակտորներ, 13 մոտոցիկլետ եւ գյուղատնտեսական տեխնիկա, այդ թվում՝ չորս կոմբայն։