Հայաստանում նեոնացիստական տրամադրություններ չկան, կա Նժդեհ. ՌԴ ԱԳՆ զեկույցը Հայաստանի մասին

Հայրենական մեծ պատերազմի հաղթանակի օրվան ընդառաջ ՌԴ ԱԳՆ կայքում զեկույց է հրապարակվել «Նացիզմի հերոսականացման, նեոնացիզմի տարածման և գործունեության այլ տեսակների իրավիճակի մասին, որոնք նպաստում են ռասիզմի ժամանակակից ձևերի, ռասայական խտրականության, այլատյացության և դրանց հետ կապված անհանդուրժողականության սրմանը»:

Զեկույցում ներկայացված է իրավիճակի վերլուծություն աշխարհի ավելի քան 40 երկրում, այդ թվում և Հայաստանում:

Մասնավորապես, զեկույցում նշվում է, որ Հայաստանը Երրորդ ռեյխի տապալման գործում խորհրդային ժողովրդի դերակատարման մասին պատմական հիշողության պահպանման, ինչպես նաև Երկրորդ աշխարհամարտի պատմության կեղծման փորձերին և նացիզմի հերոսականացմանը հակադարձելու հարցերում հավատարիմ է Ռուսաստանի հետ համաձայնեցված մոտեցմանը:

«Նացիզմի վերականգնման ակնհայտ փորձեր, նեոնացիստական տրամադրությունների բռնկումներ Հայաստանում չեն արձանագրվել: Միևնույն ժամանակ նախկին իշխող «Հանրապետական» կուսակցությունը քայլեր է ձեռնարկել ազգայնական բնույթի այնպիսի քաղաքական գործչի հիշողության հավերժացման ուղղությամբ, ինչպիսին է Գ. Նժդեհը, որի մասին տեղեկություն կա Երրորդ ռեյխի հետ համագործակցության վերաբերյալ: Հայաստանի քաղաքական կազմավորումների թվում որպես ազգայնական կողմնորոշում ունեցող կարելի է նշել «Սասնա ծռեր»-ը, որը որպես քաղաքական կուսակցություն գրանցվել է 2018-ի աշնանը», - ասվում է ՌԴ ԱԳՆ զեկույցում: