Զելենսկին առաջիկա 5 տարում բիզնեսով չի զբաղվի. նրա բիզնես գործընկեր

Ուկրաինայի նորընտիր նախագահ Վլադիմիր Զելենսկին թողել է բիզնեսը. բիզնեսում իր մասնաբաժինն իրեն կվերադարձնեն նախագահության 5-ամյա ժամկետի ավարտից հետո միայն: Այդ մասին հայտնել է Զելենսկիի բիզնես գործընկեր Սերգեյ Շեֆիրը, հայտնում է korrespondent.net-ը:

Ավելի վաղ Զելենսկին հայտարարել էր, որ մինչ խորհրդարանական ընտրությունները, որոնք պետք է տեղի ունենան աշնանը, ցանկանում է դուրս գալ իր բիզնեսից:

Զելենսկին ավելի վաղ նշել էր, որ ինքն ու իր թիմը չեն աշխատում Ռուսաստանում, սակայն լրագրողները պարզել էին, որ շոումենը ՌԴ-ում բիզնես, այնուամենայնիվ, ունի:

Համաձայն հետաքննության՝ Ռուսաստանում երեք ընկերություն պատկանում է կիպրական Green Family LTD-ին, իսկ այն Ուկրաինայում «Կվարտալ 95» ստուդիայի համահիմնադիրն է: Կիպրական ընկերության շահառուներ են նշված Զելենսկին, նրա բիզնես գործընկերներ Անդրեյ Յակովլևը, Բորիս և Սերգեյ Շեֆիրները, ինչպես նաև Տիմուր Մինդիչը: Հունվարի վերջին Զելենսկին հայտնել էր, որ դուրս է եկել կիպրական ընկերության սեփականատերերի կազմից: