Facebook-ն արգելափակել է ուլտրաաջ ակտիվիստների էջերը

Facebook սոցցանցն արգելափակել է «Իսլամի ազգ» արմատական կազմակերպության առաջնորդ Լուիս Ֆարահանի, տեսաբան Ալեքս Ջոնսի եւ էլի մի քանի ուլտրաաջ ակտիվիստների էջերը: Սոցցանցի ղեկավարությունը հայտարարել է, որ նրանք զբաղվում են ատելության տարածմամբ, փոխանցում է «Ամերիկայի ձայնը»:

«Facebook-ում տեղ չունեն մարդիկ եւ կազմակերպությունները, որոնք ատելություն են տարածում... անկախ գաղափարախոսությունից»,- նշված է ընկերության մամուլի քարտուղարի հայտարարության մեջ:

Ընկերությունից չեն հստակեցրել, թե կոնկրետ որ հրապարակումներն են դարձել արգելափակման պատճառը: Ալեքս Ջոնսը հայտնի է դարձել տեսության շնորհիվ, որի համաձայն 2001 թվականի սեպտեմբերի 11-ի ահաբեկչական հարձակումների հետեւում կանգնած էին ամերիկյան իշխանությունները: Դրանից բացի, նա Սենդի Հուք դպրոցում զանգվածային հրաձգության բեմադրված բնույթի տեսության հեղինակն է:

Ջոնսը զայրույթով է արձագանքել Facebook-ի գործողությանը՝ վերջինին մեղադրելով «զրպարտության» մեջ:

Մեկ այլ ուլտրաաջ մեկնաբան Փոլ Ջոզեֆ Ուոթսոնին սոցցանցը մեղադրել էր ռասիզմի եւ իսլամատյացության մեջ: Ուոթսոնը հայտարարել էր, որ Facebook-ի կանոնները չի խախտել:

Ֆարահանին, որը աֆրոամերիկյան ազգայնական «Իսլամի ազգ» խմբավորման վետերան է, վաղուց են մեղադրում հակասեմիթիզմի եւ աֆրոամերիկյան անջատողականության մեջ: Նա Facebook-ի գործողությանը ոչ մի կերպ չի արձագանքել:

Սոցցանցն արգելափակել է եւս մի քանի հայտնի ուլտրաաջ ակտիվիստների էջեր: Նրանց թվում են Փոլ Նելենը, Լորա Լումերը եւ Մայլո Յանոպուլոսը: