Գուաիդոն հայտարարել է պետական ծառայողների «գործադուլի» մեկնարկի մասին

Վենեսուելայի ընդդիմադիր առաջնորդ Խուան Գուաիդոն, որն իրեն երկրի նախագահի ժամանակավոր պաշտոնակատար է հռչակել, հայտարարել է մայիսի 2-ից պետական ծառայողների գործադուլի մեկնարկի մասին, սակայն երկրի գործող իշխանությունները կասկածի տակ են առել այդ գաղափարի իրատեսական լինելը:

«Երեկ երեկոյան մեր զինված ուժերի մասնակցությանբ մեկնարկեց «Ազատություն» գործողության վերջին փուլը, իսկ այժմ կմիանան նաև պետական ծառայողները: Մենք նրանց գործադուլի կտանենք, որը կսկսվի վաղը և կշարունակվի մինչև համընդհանուր գործադուլի իրականացումը»,- գրել է Գուաիդոն թվիթերյան իր էջում:

Երկրի Ազգային հիմնադիր ժողովի նախագահ Դիոսդադո Կաբելյոն իր հերթին հանդիպման ժամանակ հայտարարել է, որ Գուաիդոյի նման առաջարկը չի հաջողվի իրականացնել:

«Գործադուլի կոչ անելու համար պետք է ուժ ունենալ: Նրանք մարդիկ չունեն, ո՞ւմ են դա առաջարկում, ո՞ւմ են դրդում, ո՞վ կհամաձայնի գործադուլին»,- ասել է Կաբելյոն:

Հիշեցնենք, որ ապրիլի 30-ին Վենեսուելայում Գուաիդոյի գլխավորությամբ պետական հեղաշրջման փորձ էր տեղի ունեցել: Նա իր համախոհների հետ հավաքվել էր մայրաքաղաք Կարակասի «Կառլոտա» ռազմաբազայի առաջ և կոչ արել զինվորականներին փողոց դուրս գալ՝ աջակցելու նախագահ Նիկոլաս Մադուրոյին պաշտոնանկ անելուն ուղղված «Ազատություն» գործողությանը: Ցուցարարների և ոստիկանների միջև բախումների հետևանքով տասնյակ մարդիկ էին վիրավորվել, հաղորդվում է 2 զոհի մասին:

Մադուրոն և Վենեսուելայի պաշտպանության նախարարը հայտարարել էին, որ բանակը հավատարիմ է օրինական իշխանություններին:

Վենեսուելայում վերջին տարիներին սուր սոցիալ-տնտեսական ճգաժամ է, որն ուղեկցվում է գների կտրուկ աճով և ազգային արժույթի արժեզրկմամբ: Ընթացիկ տարում իրավիճակը կտրուկ սրվել է կառավարության և ընդդիմության միջև, ինչի հետևանքով հունվարի 23-ին ընդդիմադիր առաջնորդ Խուան Գուաիդոն իրեն նախագահի ժամանակավոր պաշտոնակատար է հռչակել, երկրում բողոքի ցույցեր են սկսվել գործող նախագահ Մադուրոյի իշխանության դեմ: Ինքը՝ Մադուրոն, տեղի ունեցողը պետական հեղաշրջման փորձ է անվանել, որը, նրա կարծիքով, հրահրում են Միացյալ Նահանգների իշխանությունները: