2045 թվականի դրությամբ սպիտակամորթներն ԱՄՆ-ում փոքրամասնություն կկազմեն. հետազոտություն

Ամերիկյան Axios մեդիահարթակը հրապարակել է ժողովրդագրության վերաբերյալ հետազոտության արդյունքները, համաձայն որոնց՝ 2045 թվականի դրությամբ սպիտակամորթ ամերիկացիները երկրում փոքրամասնություն կկազմեն:

Հետազոտության հեղինակ Ստեֆ Քայթն ընդգծել է, որ ժողովրդագրական փոփոխություններն արդեն սկսվել են: Ներկայում ոչ սպիտակամորթ ամերիկացիները մեծամասնություն են կազմում երկրի նահանգներից չորսում, ինչպես նաև ամենահզոր և զարգացած քաղաքներում:

Հեղինակը նկատում է, որ դեպքերի նման զարգացումն ԱՄՆ-ի համար առաջարկում է ապագայի երկու տարբերակ՝ բարգավաճող ազգ, որն ընդունում է իր նոր ժողովրդագրական պատկերը, կամ պայքարի, ռասիզմի և քսենոֆոբիայի սրացում:

Ըստ մասնագետների՝ այս միտումը կապված է լատինամերիկյան և ասիական ծագմամբ ներգաղթյալների մեծ ներհոսքի հետ: Բացի այդ, կարևոր դեր ունի նաև այն փաստը, որ սպիտակ մաշկ ունեցող ամերիկացիների շրջանում ծնելիության մակարդակն անհամեմատ ավելի ցածր է: Ոչ սպիտակամորթ ամերիկացիների շրջանում պատկերը հակառակն է:

Բրուքինգսի ինստիտուտի կանխատեսմամբ՝ հաջորդ տարի մինչև 18 տարեկան ամերիկացիների մեծ մասը կլինեն ոչ սպիտակամորթ բնակչության ներկայացուցիչներ: Նույն պատկերը, սակայն արդեն մինչև 30 տարիքային խմբում, կարձանագրվի առավելագույնը տասը տարուց:

Հեղինակը համակարծիք է այն մասնագետների հետ, ըստ որոնց ժողովրդագրական նոր միտումներն արդեն ազդում են ամերիկացիների ազգային ինքնության, քաղաքականության և սերունդների միջև տարբերությունների վրա:

Վերջին մի քանի տարում ԱՄՆ-ում վերսկսվել են միջռասայական լարվածությունն ու հակամիգրացիոն տրամադրությունները: Սպիտակամորթ ամերիկացիներն ի դեմս այս միտման սպառնալիք են տեսնում: Նույն կարծիքին է նաև նախագահ Դոնալդ Թրամփը, որը պաշտոնավարման ընթացքում սկսել է բավական կոշտ միգրացիոն քաղաքականություն վարել: