Ինդոնեզիայում հոգնածությունից մահացել է ընտրահանձնաժողովների ավելի քան 270 աշխատակից

Առնվազն 272 աշխատակից, որոնք ներգրավված էին Ինդոնեզիայում ընտրությունների կազմակերպման եւ անցկացման աշխատանքներում, զոհվել է, եւս 1.878-ը հիվանդացել են հոգնածության հետեւանքով, որը կապված էր ոչ նորմավորված աշխատանքային օրվա հետ, հաղորդում է DW-ը՝ վկայակոչելով Ինդոնեզիայի Կենտրոնական ընտրական հանձնաժողովի մամուլի քարտուղար Արիֆ Փրիյո Սուսանտոյին:

Նրա խոսքերով՝ ֆինանսների նախարարությունն աշխատում է զոհվածների ընտանիքներին փոխհատուցում տրամադրելու ուղղությամբ:

Ապրիլի 17-ին Ինդոնեզիայում միաժամանակ ընտրել են նախագահին, երկպալատ Ժողովրդական կոնսուլտատիվ կոնգրեսի պատգամավորներին, տարածքային եւ տեղական օրենսդիր մարմիններին: Ընդհանուր առմամբ ընտրություններին մասնակցել է 245 հազար թենկածու, որոնք պայքարել են 20 հազար պատգամավորական տեղի համար: ԶԼՄ-ների հաղորդմամբ, իրենց ծաալով աննախադեպ ընտրությունների շրջանակներում պահանջվել էր հաշվել միլիոնավոր քվեաթերթիկներ:

810 հազար ընտրատեղամասերում նորմալ ընտրական գործընթաց ապահովելու համար աշխատել է շուրջ 6 մլն մարդ: Փորձագետները համարել են, որ Ինդոնեզիայում քվեարկությունն «աշխարհում ամենաբարդ ընտրությունն» էր:

Աշխարհի ամենաբնակեցված մահմեդական երկրում (263 մլն մարդ) ընտրությունների վերջնական արդյունքները պարզ կդառնան միայն մայիսին: Համաձայն կանխատեսումների՝ 57-ամյա նախագահ Ջոկո Վիդոդոն զգալիորեն առաջ է անցել իր մրցակից ազգայնական պաշտոնաթող գեներալ Պրաբովո Սուբիանտոյից՝ հավաքելով ձայների 54-55 տոկոսը: Սուբիանտոյին սատարել է ընտրողների շուրջ 44 տոկոսը: