Բրիտանիայում նշել են Ասանժին ԱՄՆ-ին արտահանձնելու պայմանը

Մեծ Բրիտանիան Ջուլիան Ասանժին կարող է հանձնել միայն ԱՄՆ գրավոր երաշխավորության դեպքում, որ Wikileaks-ի հիմնադրին մահապատիժ չի սպառնում, եւ որ նրան կդատեն միայն այն բանի համար, ինչը պատրվակ է ծառայել արտահանձնման հարցապնդման համար, հետեւում է կառավարության կայքի տեղեկանքից, տեղեկացնում է ՌԻԱ «Նովոստի»-ն։

Ինչպես նախօրեին տեղեկացրել էր ԱՄՆ արդարադատության նախարարությունը, ԱՄՆ-ում Ասանժը մեղադրվում է դավադրության մեջ՝ համակարգչային կոտրում իրականացնելու նպատակով։ Նրա կալանման ու արտահանձնման որոշումը ԱՄՆ-ն ուղարկել է Բրիտանիա անցած տարվա դեկտեմբերին։ Մեղադրական դատավճռի կայացման դեպքում նրան սպառնում է առավելագույնը հինգ տարի բանտարկություն, բայց սովորաբար իրական ժամկետներն ավելի քիչ են օրենքով նախատեսված առավելագույնից։

Բրիտանական մեղադրանքի համաձայն (գրավի դիմաց ազատ արձակվելու պայմանների խախտում եւ դատարան չներկայանալ)՝ Ասանժին սպառնում է 12 ամսվա ազատազրկում։ Այնուամենայնիվ, Wikileaks-ի հիմնադրի կողմնակիցները պնդում են, որ ԱՄՆ-ում Ասանժին կարող են նոր մեղադրանքներ առաջադրել, այդ թվում լրտեսության մասին, ինչը կարող է հանգեցնել ավելի երկարատեւ բանտարկության։ Ոմանք կարծում են, որ ԱՄՆ-ում Ասանժին կարող է մահապատիժ սպառնալ։ Բայց պաշտոնական անձինք դա չեն հաստատում, բոլոր հայտարարությունները ենթադրություններ են մնում։

Մեծ Բրիտանիայում արտահանձնման մասին որոշում կայացնում է անձամբ ներքին գործերի նախարարը, բայց նա ղեկավարվում է եվրոպական ու բրիտանական օրենսդրության դաժան կանոններով ու նորմերով։

«Արտահանձնումն արգելված է օրենսդրական կարգով, եթե սույն անձին սպառնում է մահապատիժ (եթե նախարարը համապատասխան գրավոր երաշխիքներ չստանա, որ սույն անձը չի դատապարտվի մահապատժի, կամ, եթե դատապարտվի՝ այդ դատավճիռն ի կատար չի ածվի)»,- նշվում է բրիտանական կառավարության կայքի տեղեկանքում։

Արտահանձնումը արգելվում է նաեւ այն դեպքում, եթե հայց ներկայացնող կողմի հետ չկա պաշտոնական պայմանավորվածություն այն մասին, որ արտահանձնվողին կդատեն միայն այն բանի համար, ինչը պատճառ է հանդիսացել արտահանձնման հարցապնդման համար։

Երրորդ պատճառը, որի համար նախարարը կարող է մերժել արտահանձնումը, ոչ մի կերպ չի վերաբերում Ասանժին. Բրիտանիան չի կարող արտահանձնել մարդուն, որն արդեն արտահանձնվել է Բրիտանիային երրորդ երկրից, եթե չկա այդ երրորդ երկրի պաշտոնական համաձայնությունը։

«Եթե այս երեք տարբերակներից ոչ մեկը չի կիրառվում այս գործում, նախարարը պետք է հավանություն տա արտահանձնմանը։ Իսկ եթե արտահանձնումն արգելվում է, սույն անձը պետք է ազատ արձակվի»,- ասվում է կառավարության տեղեկանքում։

Նախարարը պետք է արտահանձնման մասին որոշում ընդունի գործը դիտարկման վերցնելուց հետո երկու ամսվա ընթացքում։ Նա իրավունք ունի դիմել Գերագույն դատարան՝ խնդրելով երկարացնել այդ ժամկետը, ընդ որում՝ դա կարող է անել մի քանի անգամ։