Թրամփը Ասանժի ձերբակալության մասին՝ ոչինչ չգիտեմ WikiLeaks-ի մասին

ԱՄՆ նախագահ Դոնալդ Թրամփը ինքնատիպ է արձագանքել Ջուլիան Ասանժի ձերբակալության մասին հարցին։ Ամերիկյան առաջնորդը հայտարարել է, որ ընդհանրապես ոչինչ չգիտի WikiLeaks-ի մասին եւ տեղյակ չէ իրազեկիչի պատմությանը՝ հայտնում է Life-ը։

«Ես ոչինչ չգիտեմ WikiLeaks-ի մասին։ Դա իմ թեման չէ»,- հինգշաբթի օրը ճեպազրույցում հայտարարել է Թրամփը։

Նա հավելել է, որ մտադիր չէ միջամտել իրադարձություններին, եւ հետագա բոլոր որոշումները բարդել է գլխավոր դատախազ Բարի վրա։

Հիշեցնենք, որ Ջուլիան Ասանժը յոթ տարի թաքնվում էր Լոնդոնում Էկվադորի դեսպանատանը։ Նա մտավախություն ուներ արտահանձնվել ԱՄՆ-ին, որտեղ նրան 35 տարվա ազատազրկում էր սպառնում կամ մահապատիժ՝ Պետդեպարտամենտի գաղտնի փաստաթղթերը հրապարակելու համար։

Ապրիլի 11-ին Էկվադորի իշխանությունները մերժեցին Ասանժին քաղաքական ապաստան տրամադրելու հարցում, եւ Wikileaks-ի հիմնադիրը կալանավորվեց։