Իսրայելի օդանավակայանի էլեկտրոնային չվացուցակում ներառվել է թռիչքը դեպի Լուսին

Իսրայելի գլխավոր օդանավակայանը վայրէջքների չվացուցակում ներառել է դեպի Լուսին իրականացված թռիչքը, որն այսօր երեկոյան մոտենում է ավարտին:

Ինչպես հաղորդում է РИА Новости-ն, Թել Ավիվի Դավիթ բեն Գուրիոնի անվան օդանավակայանի էլեկտրոնային չվատախտակի վրա Ստամբուլից և Մադրիդից ժամանող չվերթների հետ միասին նշվում է «Բերեշիթ» տիեզերանավի վայրէջքը Լուսնի վրա 22:00-ին (երևանյան՝ 23:00): Կից գրառմամբ հաղորդվում է, որ ժամը «վերջնական չէ»:

Լուսնային արշավի կազմակերպիչները նշում են, որ անօդաչու տիեզերական սարքի վայրէջքը, որն արդեն գտնվում է Երկրի արբանյակի ուղեծրի տարածքում, ակնկալվում է 22:25-ին: Հաջողության դեպքում Իսրայելը կդառնա դեպի Լուսին թռիչք իրականացրած 4-րդ երկիրը ԽՍՀՄ-ից, ԱՄՆ-ից և Չինաստանից հետո: