WikiLeaks-ը խնդրել է նվիրատվություններ անել Ասանժի օգնության ֆոնդին

WikiLeaks կազմակերպությունը կոչով դիմել է նվիրատվություններ անել նրա հիմնադիր Ասանժի օգնության ֆոնդին, որը ձերբակալվել է բրիտանական ոստիկանության կողմից Լոնդոնում Էկվադորի դեսպանությունում։ Այս մասին ասվում է Twitter-ի պաշտոնական կայքում հինգշաբթի հրապարակված տեղեկությունում, հաղորդում է ՏԱՍՍ-ը։

«Ջուլիան Ասանժը ձերբակալվել է բրիտանական ոստիկանության կողմից։ Նվիրատվություններ արեք»,- ասվում է կոչում։ Նույն հաղորդագրությունում հղում կա ինտերնետ էջին, որի միջոցով կարելի է փոխանցումներ անել WikiLeaks Defence Fund-ին։ Նվիրատվությունները կարող են իրականացվել բանկային հաշիվներից կամ քարտերից փոխանցումներով, կրիպտոարժույթի ձեւով, ինչպես նաեւ կանխիկ փողով կամ բանկային չեքով, որոնք կարելի է ուղարկել փոստով՝ նշված հասցեով։

WikiLeaks WikiLeaks Defence Fund-ը պարզաբանել է, որ իր միջոցներից կվճարի փաստաբանների աշխատանքը, որոնք պաշտպանում են Ասանժին ու այն մարդկանց, որոնք տրամադրում են այդ կազմակերպությանը գաղտնի տվյալներ հրապարակման համար։

WikiLeaks-ը նաեւ Twitter-ում հրապարակել է Ասանժի նկարն ու գրել. «Այս մարդը որդի է, հայր եւ եղբայր։ Նա մի շարք մրցանակներ է ստացել լրագրության ոլորտում։ Սկսած 2010-ից ներկայացվել է Նոբելյան մրցանակի։ Հզոր ուժերը, ներառյալ ԿՀՎ-ն, հմուտ քարոզչություն են վարում, որպեսզի դիմազրկեն նրան, ապալեգիտիմացնեն ու բանտ նստեցնեն։ Պաշտպանե՛նք Ջուլիանին»։