Մեկանգամյա սնունդ, 8 կմ ոտքով քայլք, սառը ջրով վաննաներ. Twitter-ի միլիարդատեր հիմնադիրը պատմել է խիստ առօրյայի մասին

Ամերիկյան Twitter սոցկայքի հիմնադիր, գործադիր տնօրեն Ջեք Դորսին պատմել է իր առօրյայի մասին՝ մանրամասնելով, որ հետևում է խիստ սննդակարգի, պարտադիր մարզվում է, օրական մի քանի ժամ մեդիտացիայով է զբաղվում, հրաժարվել է բոլոր վնասակար սովորություններից:

Ինչպես նշում է Daily Mail-ը, 42-ամյա միլիարդատերը պատմել է, որ օրվա մեջ սնվում է միայն մեկ անգամ՝ ճաշին, մինչդեռ ուրբաթ և շաբաթ օրերին ընդհանրապես չի սնվում: Դրա փոխարեն նա անընդհատ ջուր է խմում, վիտամիններ ընդունում:

Մթերքներից նա նախընտրում է ձկնեղեն, հավի միս, սթեյք, աղցաններ, հատապտուղներ, բանջարեղեն և սև շոկոլադ: Հատուկ առիթներին նա իրեն թույլ է տալիս կարմիր գինի, սակայն շատ փոքր չափաբաժնով, որպեսզի դա վատ չանդրադառնա առողջ քնի վրա:

Բացի այդ` Դորսին հրաժարվել է տաք ջրով լոգանքներից, ամեն օր իր տնից ոտքով 8 կմ է անցնում աշխատավայր հասնելու համար: Դորսիի խոսքով՝ ինքն այս ամենն անում է միտքը մշտապես սթափ վիճակում պահելու համար:

5,3 մլրդ դոլար կարողության տերը նշել է, որ այսպիսի առօրյայի շնորհիվ ժամանակն իր համար ավելի դանդաղ է անցնում:

Դորսին հավելել է, որ օրը պարտադիր սկսում է սառը ջրով վաննայի ընդունումից:

«Ոչինչ ինձ այդքան վստահություն և թարմություն չի հաղորդում, որքան վաղ առավոտյան սառը ջրով վաննան»,-նշել է միլիարդատերը՝ հավելելով, որ օրվա մեջ երեք անգամ այդպիսի վաննա է ընդունում:

Ինչ վերաբերում է սթրեսին, ապա Դորսին նշել է, որ այն հաղթահարում է մեդիտացիայի միջոցով: Բացի այդ՝ նա իր համար սահմանել է տասը օր, որի ընթացքում նա ո՛չ կարդում է, ո՛չ գրում, ո՛չ էլ որևէ էլեկտրոնային սարքից օգտվում: