Թուրքիան սպառնացել է փոխարինող գտնել F-35 կործանիչներին

Անկարան կգտնի F-35-ի փոխարինող, եթե ԱՄՆ-ը հրաժարվի մատակարարել այդ կործանիչներն այն պատճառով, որ Թուրքիան գնում է ռուսական Ս-400 զենիթահրթիռային համալիրներ, ասել է Թուրքիայի արտգործնախարար Մեւլութ Չավուշօղլուն, տեղեկացնում է ՌԻԱ «Նովոստի»-ն։

«Եթե չստացվի գնել F-35, ապա Թուրքիան կգնի համանման ինքնաթիռներ այլ երկրներից։ Եվ այդպես կշարունակվի՝ մինչեւ հինգերորդ սերնդի մեր սեփական կործանիչների արտադրությունն սկսելը»,- ասել է Չավուշօղլուն NTV հեռուստաալիքի եթերում։

Ավելի վաղ Թուրքիան հայտարարել էր, որ չի հրաժարվի Ս-400-ներ գնելու ծրագրից եւ որ ՀՕՊ համակարգերի առաջին խմբաքանակը երկիր կհասնի հուլիսին։ ԱՄՆ-ը հայտարարում է, որ Ս-400 համակարգերն անհամատեղելի են ՆԱՏՕ չափորոշիչների հետ, դրանց հնարավոր ձեռքբերման պատճառով սպառնում է պատժամիջոցներով եւ քանիցս ասել է, որ կարող է հետ պահել կամ չեղարկել Թուրքիային սեփական նորագույն F-35 ինքնաթիռների վաճառքի գործընթացը։