Իրանցի պատգամավորներն ի նշան ԱՄՆ-ի դեմ բողոքի խորհրդարան են գնացել զինվորական համազգեստով

Իրանցի պատգամավորներն ապրիլի 9-ին խորհրդարան են գնացել Իսլամական հեղափոխության պահապանների կորպուսի զինվորական համազգեստով՝ այդ կերպ բողոքելով ԱՄՆ նախագահ Դոնալդ Թրամփի՝ պահապանների կորպուսն «օտարերկրյա ահաբեկչական կազմակերպություն» ճանաչելու որոշման դեմ:

Ինչպես նշում է The Guardian-ը, նրանցից ոմանք բղավել են «Մա՛հ Ամերիկային» կարգախոսը:

Բրիտանական պարբերականը մանրամասնում է, որ այժմ ԱՄՆ-ն Իսլամական հեղափոխության պահապանների կորպուսն «Իսլամական պետության» և «Ալ Քաիդա»-ի հետ նույն շարքին է դասել: Բացի այդ, Վաշինգտոնն արդեն «սև ցուցակում» է ներառել Իրանի իսլամական հեղափոխության պահապանների կորպուսի հետ առնչություն ունեցող տասնյակ ընկերությունների և անձանց: Հայտնի է, որ Թրամփի որոշումն արդեն ողջունել են Իրանի թշնամի պետություններ Իսրայելն ու Սաուդյան Արաբիան:

Հայտնի է, որ երկրի գերագույն հոգևոր առաջնորդ այաթոլլահ Ալի Խամենեին, որը երկրի բոլոր պետական գործերում «վերջին խոսքն» ասողն է, արդեն հանդիպել է կորպուսի անդամների հետ: Նա ընդգծել է, որ ամերիկացիների՝ Իրանի և Իսլամական հեղափոխության դեմ քայլերը չեն կարող որևէ վնաս պատճառել:

Մինչդեռ երկրի նախագահ Հասան Ռոհանին հայտարարել էր, որ ԱՄՆ-ի զինված ուժերի կենտրոնական հրամանատարությունն, ի պատասխան, կդասակարգվի որպես «ահաբեկչական կազմակերպություն», իսկ ԱՄՆ կառավարությունը՝ ահաբեկչության հովանավոր երկիր:

«Դուք ո՞վ եք, որպեսզի հեղափոխական ինստիտուտներն ահաբեկչական որակեք: Համաշխարհային ահաբեկչության առաջնորդը հենց դուք եք: Ձեր թույլ տված սխալը կմիավորի իրանցիներին ու պահապանների կորպուսին, որն Իրանում և տարածաշրջանում ավելի ազդեցիկ կդառնա»,-ասել էր Ռոհանին:

Աղբյուրը մանրամասնում է, որ Իրանի իսլամական հեղափոխության պահապանների կորպուսն ունի 125 000 անդամ, բանակային, ռազմածովային և ռազմաօդային ստորաբաժանումներ և հաշվետու է միայն այաթոլլահ Ալի Խամենեիին: Կորպուսը պատասխանատու է երկրի հրթիռային ծրագրի, ինչպես նաև այլ երկրներում ռազմական գործողությունների համար:

Հայտնի է, որ Իրանի իսլամական հեղափոխության պահապանների կորպուսը ստեղծվել է 1979թ. տեղի ունեցած Իսլամական հեղափոխությունից հետո:

Հիշեցնենք, որ ապրիլի 8-ին Թրամփը հայտարարել էր, որ երկրի իշխանություններն Իրանի իսլամական հեղափոխության պահապանների կորպուսն «օտարերկրյա ահաբեկչական կազմակերպություն» են ճանաչում:

«Սա Պետքարտուղարության կողմից իրականացված աննախադեպ քայլ է, որը ճանաչում է այն փաստը, որ Իրանը ոչ միայն ահաբեկչությունը հովանավորող երկիր է, այլ նաև այն, որ Հեղափոխության պահապանների կորպուսն ակտիվորեն մասնակցում է դրա ֆինանսավորմանն ու ահաբեկչությունը կիրառում է որպես պետական կառավարման գործիք»,-ասվում է հայտարարությունում:

Ավելի վաղ ոլորտի փորձագետները նախազգուշացրել էին, որ եթե, այնուամենայնիվ, այս որոշումը կայացվի, ապա ԱՄՆ-ի և Իրանի առանց այն էլ լարված հարաբերություններում սրացման նոր փուլ կսկսվի: