Իսրայելուհին ապահարզան է պահանջել, երբ հայտնաբերել է, որ ամուսինն իրեն անդամագրել է Նեթանյահուի «Լիկուդ» կուսակցությանը

Իսրայելում Կնեսեթի ընտրությունների անցկացման օրը «Մակո» կայքը պատմել է երկրի կենտրոնից մի ընտանիքի դրամայի մասին:

Հրապարակման մեջ նշվում է, որ 4 երեխաներ ունեցող ամուսինների հարաբերությունները փչացել են այն բանից հետո, երբ կինը հայտնաբերել է, որ «Լիկուդ» կուսակցության անդամ է:

Կնոջ խոսքով՝ ինքը ստիպված էր մի ամբողջ հետաքննություն անցկացնել պարզելու համար, թե ինչու է սկսել հաղորդագրություններ ստանալ, որոնք հասցեագրված են «Լիկուդի» անդամներին: Վերցնելով կուսակցության մեջ գրանցվելու ձեւաթուղթը՝ նա հայտնաբերել է, որ այն լրացրել է իր ամուսինը: Կինը պնդում է, որ ամուսինը նշել է ոչ միայն իր անձնական տվյալները, այլեւ կեղծել է իր ստորագրությունը:

Կինն իր փաստաբանների միջոցով դիմել է ռաբբիական դատարան՝ ապահարզան պահանջելով եւ ամուսնուն մեղադրելով «բռնության գործադրման մեջ»:

«Մակոն» նշում է, որ ամուսինը չի հերքում այն, որ կնոջը գրանցել է «Լիկուդի» մեջ: Նրա խոսքով՝ դա արել է մտերիմ ընկերոջն օգնելու համար, որին կուսակցության 10 նոր անդամ էր պետք: Սակայն տղամարդը երդվում է, որ չնայած տվել է կնոջ տվյալները, նրա ստորագրությունը չի կեղծել:

Կինը պահանջել է, որ ամուսինն անմիջապես իրեն տա ապահարզանի մասին նամակը («գեթ») եւ վճարի գումարը, որն իրեն վերապահված է ամուսնական պայմանագրով, հակառակ դեպքում կդիմի ոստիկանություն:

Այս գործով ռաբբիական դատարանի նիստը տեղի կունենա Կնեսեթի ընտրություններից հետո 2 շաբաթ անց: