Ո՞ւմ էր հասցեագրված Ռոբերտ Քոչարյանի խոսքը

ՀՀ երկրորդ նախագահ Ռոբերտ Քոչարյանի վերջին հարցազրույցը մեծ հետաքրքրություն եւ արձագանք է գտել: Երկրորդ նախագահն անդրադարձել է հանրությանը հուզող եւ հետաքրքրող բազամթիվ թեմաների, եւ բացի այդ մատնանշել այն վտանգները, որոնց բախվել եւ հնարավոր է բախվի մեր երկիրը: 

Եւ քանի որ Հայաստանում քաղաքական դաշտը վաղուց է ամայացել, ապա միանշանակ է, որ Ռոբերտ Քոչարյանի խոսքն ուղղված է հանրության տարբեր շերտերին եւ նոր ձեւավորվող քաղաքացիական հանրությանը:

Բնականաբար, առաջին հերթին Ռոբերտ Քոչարյանը պետք է անդրադառնար Արցախի խնդրին: Նա տվել է բավական հստակ գնահատականներ եւ արել հարցադրումներ, որոնց պետք է շատ լուրջ վերաբերել.

ա. Կասկած է առաջացնում նույնիսկ ոչ թե՝ բանակցությունների բուն փաստը, այլ այն ջանասիրությունը, որով վարչապետը փորձում է հրաժարվել դրանց գոյությունից։

բ. Ինչպե՞ս կարելի է հաջող բանակցություններ վարել՝ առանց ձեւակերպված դիրքորոշման։ 

գ. Ղարաբաղյան կարգավորման մեջ կան մի շարք սկզբունքային դրույթներ, որոնց վերաբերյալ իշխանությունները պետք է հստակ մոտեցումներ ունենան բանակցություններ սկսելուց առաջ։

դ. Հրաժարվեցինք մեզ ձեռնտու Վիեննայի եւ Սանկտ Պետերբուրգի՝ շփման գծում վստահության միջոցների ամրապնդմանը միտված համաձայնությունները։ 

ե. Հայկական կողմը զիջումներ անելու պատրաստակամության առումով չափից ավելի բարձր սպասումներ առաջացրեց՝ ինչպես Ադրբեջանում, այնպես էլ՝ համանախագահների մոտ։ Ու հենց այդ պատճառով էլ, կարծում եմ, որ Մինսկի խմբի հաջորդ առաջարկներն առանձնապես դուրեկան չեն լինելու։

Եթե հաշվի առնենք Ռոբերտ Քոչարյանի նախագահության շրջանում հայ-ռուսական հարաբերությունների աննախադեպ ջերմացումը եւ տնտեսական սերտ համագործակցությունը, ապա ավելի է կարեւորվում հայ-ռուսական հարաբերություններին եւ գազի սակագնի շուրջ բանակցություններին Ռոբերտ Քոչարյանի տված գնահատականները.

1. Խնդիրն իսկապես սկզբունքորեն լուծված է՝ գազը թանկացել է։ Այս թանկացման համար ուղղակի կամ անուղղակի ձեւով վճարելու են հայաստանցի սպառողները:

2. Հայաստանի իշխանական նոր թիմի եւ ռուսական էլիտայի աշխարհընկալումները տրամագծորեն տարբերվում են, եւ այդ հանգամանքն անընդհատ ներկա է լինելու երկկողմ հարաբերություններում։

Իհարկե, ՀՀ երկրորդ նախագահն անդրադարձել է նաեւ կառավարության ներկայացրած ծրագրին, տալով դիպուկ գնահատականներ.

ա. Դա ծրագիր է ծրագրի բացակայության մասին, եւ տնտեսական 5%-անոց աճով խոսել դրա հեղափոխականության մասին՝ պարզապես ծիծաղելի է։

բ. Իշխանությունն այդպես էլ չհասկացավ, որ երկրի ներդրումային գրավչության տեսանկյունից «հեղափոխություն» բրենդը բոլոր հնարավորներից վատագույնն է։

գ. Աղքատության պատճառը մարդկանց գլուխ­ներում չէ, այլ իշխանավորների ողորմելի մտածելակերպի մեջ։

Հատուկ ուշադրության է արժանի նաեւ երկրորդ նախագահի այն կանխատեսումը, որ աշնան մոտ իշխանությունների վարկանիշը այնչափ կգահավիժի, որ նրանց լեգիտիմության հարցն արդիական կդառնա։

Խոսելով իրեն ներկայացված հին եւ նոր մեղադրանքներին, Ռոբերտ Քոչարյանը շեշտել է. 

1. Նոր մեղադրանքն ասես ՀՔԾ-ում գրված էժան գրոտեսկային կատակերգության սցենար լինի, որտեղ գլխավոր հերոս է հանդիսանում ամենահաս ու կասկածելի գործարար վարկ ունեցող մի տիկին։

2. Մեղադրանքի բոլոր 76 հատորների 90 տոկոսը ոչ մի կապ չունի ՔՕ 300․1 հոդվածի հետ, որը, ի դեպ, գոյություն չուներ 2008 թվականի մարտին, եւ այդ իսկ պատճառով դրա կիրառումն անհնար է։

Ռոբերտ Քոչարյանի համոզմամբ, հասարակության բեւեռացումը, ներքին լարվածության ու դիմակայության մշտական օջախների ստեղծումը Հայաստանի իշխանությունների աշխատանքի էությունն են դարձել, ինչը, ըստ նրա, ոչ մի լավ բանի չի կարող բերել։

Գեղամ Նազարյան

Top-News.am