Պակիստանի նախկին վարչապետին հիվանդանոցից նորից բանտ են տարել

Պակիստանի նախկին վարչապետ Իմրան Խանը հիվանդանոցում մի քանի ժամ անցկացնելուց հետո վերադարձվել է բանտ. հայտնել է նրա կուսակցության ներկայացուցիչը։

73-ամյա Խանը ուրբաթ վաղ առավոտյան տեղափոխվել էր Իսլամաբադի հիվանդանոց՝ բժշկական հետազոտություն անցնելու նպատակով ։ Նրա «Պակիստանի շարժում հանուն արդարության» (Pakistan Tehreek-e-Insaf) կուսակցության ներկայացուցիչը հաստատել է, որ նախկին վարչապետը վերադարձվել է Ռավալպինդի կայազորային քաղաքում գտնվող Ադիալա բանտ։

Խանը կալանքի տակ է գտնվում 2023 թվականի օգոստոսից։ Նա պնդում է, որ իր դեմ հարուցված քրեական գործերը քաղաքական դրդապատճառներ ունեն, սակայն կառավարությունը հերքում է այդ մեղադրանքները։

Խանի փաստաբանների պնդմամբ՝ նրա առողջական վիճակը բանտում վատթարացել է, մասնավորապես՝ զգալիորեն վատացել է աջ աչքի տեսողությունը։ Մինչդեռ կառավարությունը հայտարարել է, որ մինչ այժմ կատարված բժշկական հետազոտությունների արդյունքում չի հայտնաբերվել որևէ հիվանդություն կամ վիճակ, որը պահանջում է անհապաղ կամ հատուկ բուժում։

Գերագույն դատարանը երեքշաբթի կայացրած որոշմամբ իշխանություններին պարտավորեցրել էր 48 ժամվա ընթացքում Խանին տեղափոխել Իսլամաբադի «Շիֆա» միջազգային հիվանդանոց և ապահովել նրա մասնակցությունը բժշկական հանձնաժողովի կողմից իրականացվող հետազոտությանը։ Հանձնաժողովի կազմում պետք է ընդգրկվեր նաև նրա անձնական բժիշկը։