ԱՄՆ-ն, Իրանն ու Օմանը մոտ են համաձայնագրին

Միացյալ Նահանգները, Իրանն ու Օմանը մոտենում են Հորմուզի նեղուցի վերաբերյալ ժամանակավոր համաձայնագրի կնքմանը, և, ինչպես հաղորդում է Axios-ը, Վաշինգտոնը նպատակ ունի այս մասին պաշտոնապես հայտարարել չորեքշաբթի օրը։

Գործարքի նպատակն է վերսկսել հրադադարը Միացյալ Նահանգների և Իրանի միջև և շարունակել բանակցությունները միջուկային համաձայնագրի շուրջ: Նախագահ Դոնալդ Թրամփը հրաժարվել է լայնածավալ ռմբակոծություններից՝ դիվանագիտությանը ժամանակ տալու համար, սակայն համաձայնության չգալու դեպքում սպառնում է կանաչ լույս վառել հարվածների համար։

Քննարկվող պայմանավորվածությունը նախատեսում է 60-օրյա ժամանակավոր կարգավորում Օմանի և Իրանի միջև։ Ըստ տարածաշրջանային աղբյուրների՝ նեղուցով դեպի ծոց մուտք գործող բոլոր նավերը կանցնեն հյուսիսային գոտով՝ իրանական ջրերով, իսկ հակառակ ուղղությամբ շարժվող նավերը՝ հարավային գոտով՝ օմանյան ջրերով։ Այս ժամանակահատվածում տուրքեր կամ վճարներ չեն գանձվի, իսկ կողմերը կաշխատեն 30 օրվա ընթացքում ռազմածովային ականներից մաքրել նեղուցի մեջտեղի հատվածը։

Այնուամենայնիվ, Սպիտակ տունն ու միջնորդները զգուշավոր են, քանի որ շաբաթներ առաջ արդեն կար նախնական պայմանավորվածություն, որը ձախողվել էր իրանական նոր հարձակումների պատճառով։ Ինչպես փոխանցում են տարածաշրջանային աղբյուրները, վերջին օրերին ինտենսիվ բանակցություններ են վարել ԱՄՆ բանագնաց Սթիվ Վիտկոֆը, Իրանի արտգործնախարար Աբբաս Արաղչին և Օմանի արտգործնախարար Բադր ալ-Բուսաիդին, և երեքշաբթի օրը իրանական ղեկավարությունն ավարտել է գործարքի հաստատման գործընթացը։