Բրոնզե մեդալ՝ Եվրոպայի աշխարհագրության միջազգային 12-րդ օլիմպիադայում

Հայաստանի ներկայացուցիչները հունիսի 27-ից հուլիսի 3-ը Բուլղարիայի Վառնա քաղաքում մասնակցել են Եվրոպայի աշխարհագրություն միջազգային 12-րդ օլիմպիադային և մեկ բրոնզե մեդալ նվաճել: Այս մասին տեղեկացնում են ԿԳՄՍՆ-ից:

Բրոնզե մեդալին արժանացել է «Քվանտ» վարժարանի 11-րդ դասարանի աշակերտ Միքայել Դարբինյանը: Հայաստանի թիմում ընդգրկված էին նաև «Քվանտ» վարժարանի 12-րդ դասարանի աշակերտներ Էրիկա Հարությունյանը և Սարգիս Խալաթյանը, ինչպես նաև Ա․Շահինյանի անվան ֆիզմաթ մասնագիտացված դպրոցի 11-րդ դասարանի աշակերտ Սամվել Խաչատրյանը և Գյումրու ակադեմիական վարժարանի 10-րդ դասարանի աշակերտ Սամվել Մխիթարյանը։

Թիմը մարզել են Վարդան Ասատրյանը (ԵՊՀ, «Քվանտ»  վարժարան), Սաթի Հայրապետյանը (Լյուքսեմբուրգի բիզնես դպրոց) և Հայկ Անտոնյանը (Լյուվենի համալսարան)։

Եվրոպայի աշխարհագրության միջազգային օլիմպիադան, որը համարվում է միջազգային օլիմպիադայի դուստր ստուգատես, անցկացվել է երեք փուլով` գրավոր, դաշտային և մուլտիմեդիա։ Այն, ըստ կարգի, անցկացվում է բացառապես անգլերեն լեզվով։

Օլիմպիադային, ընդհանուր առմամբ, 20 երկրի 97 աշակերտ է մասնակցել: