Ամերիկյան ատոմային սուզանավը հասել Է Հարավային Կորեայի ափերին․ Yonhap

ԱՄՆ ռազմածովային ուժերի «Լոս Անջելես» դասի USS Greeneville ատոմային սուզանավը երեքշաբթի օրը ժամանել է Հարավային Կորեայի ափամերձ Բուսան քաղաքի ռազմածովային բազա՝ պաշարների համալրման և անձնակազմի հանգստի համար։ Այս մասին հայտնում է «Yonhap» գործակալությունը՝ հղում անելով հարավկորեական զինվորականներին։

Նշվում է, որ ատոմային սուզանավի երկարությունը 110 մետր է, լայնությունը՝ 10 մետր, իսկ անձնակազմը բաղկացած է 110 հոգուց։ USS Greeneville սուզանավը հագեցած է «Տոմահավկ» տեսակի բարձր ճշգրտության թևավոր հրթիռներով և 12 ուղղահայաց արձակման կայանքներով, ինչպես նաև տորպեդներով և չորս տորպեդային ապարատներով։

Ըստ «Ռյոնհապ»-ի տեղեկությունների՝ հարավկորեական բազայում ամերիկյան սուզանավի գտնվելու առթիվ Կորեայի Հանրապետության ռազմածովային ուժերը ծրագրում են փորձի փոխանակում իրականացնել ԱՄՆ զինվորականների հետ, ինչը թույլ կտա «էլ ավելի ամրապնդել համատեղ մարտունակությունը»։

Ընդ որում, USS Greeneville-ը դարձել է ԱՄՆ առաջին ատոմային սուզանավը, որը ժամանել է Կորեական թերակղզու ափեր՝ հունիսին պաշտոնը ստանձնած Հարավային Կորեայի նախագահ Լի Չժե Մյոնի օրոք: Մինչ այդ նշված սուզանավը Կորեայի Հանրապետություն է այցելել երեք անգամ, վերջին անգամ՝ 2016 թվականին:

Ինչպես ընդգծել է գործակալությունը, վերջին անգամ ամերիկյան ատոմային սուզանավը հարավկորեական նավահանգիստ է մտել 10 ամիս առաջ. այս տարվա փետրվարին «Լոս Անջելես» դասի USS Alexandria սուզանավը նույնպես ժամանել է Բուսանի ռազմածովային բազա՝ պաշարների համալրման և անձնակազմի հանգստի համար: