Եվրոպայում խոշորագույն հանքավայրի մշակումը կանգնել է հազվագյուտ բզեզների պատճառով

Եվրոպայում հազվագյուտ հողային մետաղների խոշորագույն հանքավայրի մշակման ծրագրերը հայտնվել են վտանգի տակ՝ բզեզների, մամուռների և սնկերի հազվագյուտ տեսակների վրա արդյունահանման ազդեցության հետ կապված մտահոգությունների պատճառով. հայտնում է Phys.org-ը։ 

Տարածքն ուսումնասիրած փորձագետները հայտնաբերել են կենդանիների և բույսերի 78 տեսակ, որոնք ընդգրկված են Նորվեգիայի վտանգված տեսակների Կարմիր ցուցակում։ Դրանց թվում են սապրոքսիլային բզեզները, որոնց կյանքը կախված է փտած փայտից, ինչպես նաև հազվագյուտ մամուռներ ու սնկեր։ Մարզային իշխանությունները խորհրդակցություններից հետո պաշտոնապես դեմ են արտահայտվել ենթակառուցվածքների առաջարկվող տեղակայմանը՝ վկայակոչելով կենսաբազմազանությանը սպառնացող վտանգը։

Արդյունքում ընկերությունը ստիպված է վերանայել իր ծրագրերը և նախագծի մի մասի համար այլընտրանքային վայրեր փնտրել։ Սա վեճեր է առաջացրել մշակման կողմնակիցների միջև, որոնք սա հնարավորություն են համարում նոր աշխատատեղեր ստեղծելու և տարածաշրջանի տնտեսությունն ամրապնդելու համար, և բնապահպանների միջև, որոնք հորդորում են հանուն արդյունաբերության չզոհաբերել եզակի էկոհամակարգերը։