Մոսկվան սպասում է Վաշինգտոնից լուրերի, Վաշինգտոնը՝ Մոսկվայից արձագանքների

Կրեմլը սպասում է Բեռլինի հանդիպումների արդյունքների մասին Վաշինգտոնի տեղեկություններին.  ԱՄՆ նախագահի հատուկ բանագնաց Սթիֆ Ուիթքոֆին այս շաբաթ սպասում են Մոսկվայում, հայտնել է ՌԴ նախագահի մամուլի քարտուղար Դմիտրի Պեսկովը։

«Մենք սպասում ենք, որ պատրաստ լինելուն պես մեր ամերիկացի գործընկերները կտեղեկացնեն ուկրաինացիների եւ եվրոպացիների հետ աշխատանքի արդյունքների մասին»,- ասել է նա լրագրողներին։

Բեռլինում Ուիթքոֆի, Զելենսկու եւ եվրոպական առաջնորդների հանդիպումը անցկացվել է կիրակի եւ երկուշաբթի։ Ուկրաինայի նախագահը լրագրողներին տեղեկացրել է, որ ամերիկյան կողմը Ռուսաստանին կփոխանցի խաղաղության թարմացված ծրագիրը եւ Մոսկվայից պատասխան ստանալուն պես Ուկրաինայի հետ կանցկացնի նոր խորհրդակցություններ։

Իր հերթին Վաշինգոտնը պատրաստում է Ռուսաստանի դեմ նոր պատժամիջոցներ խաղաղության ծրագրի շուրջ բանակցությունները ձախողելու դեպքում։ Այս մասին էլ հաղորդում է  Bloomberg-ը։

Գործակալության աղբյուրները հայտնել են, որ ԱՄՆ քննարկում է զանազան տարբերակներ, այդ թվում պատժամիջոցներ «ստվերային նավատորմի» եւ դրա ծառայություններից օգտվողների դեմ։

Bloomberg-ի զրուցակիցները հայտնել են, որ նոր պատժամիջոցները կարող են հրապարակվել արդեն այս շաբաթ։ ԱՄՆ ֆինանսների նախարար Սքոթ Բեսենթն արդեն այս ծրագրերը քննարկել է եվրոպական երկրների դեսպանների հետ։

«Նախագահ Թրամփը խաղաղության նախագահ է, եւ ես հաստատել եմ, որ Ամերիկան նրա առաջնորդությամբ կշարունակի առաջնահերթ ուշադրություն հատկացնել Ուկրաինայում պատերազմի դադարեցմանը»,- գրել է նա X սոցցանցում։

Գործակալության աղբյուրները միաժամանակ զգուշացրել են, որ վերջնական որոշումը կախված է Թրամփից։