Տղամարդը դատի է տվել խաղատանը՝ արթնանալով ձեռնաշղթաներով և 75,000 դոլար պարտքով

Լաս Վեգասի Aria խաղատան բազմամյա հաճախորդը քաղաքացիական հայց է ներկայացրել՝ պնդելով, որ իրեն մեղադրել են 75 հազար դոլարի խաղային պարտք ունենալու մեջ այնպիսի իրադարձություններից հետո, որոնք ինքը չի կարողանում հիշել։ Այս մասին հայտնում է Dexerto-ն։

Ինչպես նշվում է հայցում, հաջորդ բանը, որ նա հիշում է, առավոտյան խաղատան անվտանգության սենյակում արթնանալն է, որտեղ նա ձեռնաշղթաներով ամրացված է եղել պատին։ Aria-ի աշխատակիցները նրան հայտնել են, որ անվտանգության ծառայությունը նրան հայտնաբերել է Sky Suites լաունջում քնած վիճակում, իսկ արթնացնելու փորձի ժամանակ նա իբր իրեն ագրեսիվ է պահել, ինչից հետո բերման է ենթարկվել։ Թոմսոնին պահել են մինչև ուշ առավոտ, այնուհետև արգելել են այցելել խաղատուն (պերսոնա նոն գրատա): Ընդ որում, նրա խոսքով, իրեն չեն տեղեկացրել որևէ պարտքի մասին։

Մայքլը հայտարարում է, որ հետագայում բազմիցս փորձել է պարզել, թե ինչ է տեղի ունեցել այն ժամանակահատվածում, որը ինքը չի հիշում։ Կապ հաստատելով խաղատան ներկայացուցիչների հետ՝ նա իմացել է, որ Aria-ն իրեն համարում է խաղային վարկի գծով պարտապան և մատնանշում է ստացված մարկերների գումարի ու գրանցված շահումների ու կորուստների միջև առկա անհամապատասխանությունները։ Ընդ որում, ըստ հայցվորի, խաղատունը նրան չի տրամադրել մանրամասն բացատրություններ կամ հիմնավորող փաստաթղթեր։

ՄԻնչպես պնդում են՝ մի քանի ամիս անց խաղատունը Թոմսոնի բանկ է ներկայացրել ութ խաղային մարկեր՝ ընդհանուր 75 հազար դոլարի չափով։ Տղամարդու վարկածով՝ խաղատնից հայտնել են, որ բոլոր ութ չեկերը ձևակերպվել են իր կողմից առավոտյան ժամը 3:00-ից 9:00-ն ընկած ժամանակահատվածում՝ մի ժամանակահատված, որը նա ընդհանրապես չի հիշում։ Նա նաև պնդում է, որ փաստաթղթերի վրայի ստորագրությունները միայն հեռվից են հիշեցնում իր սեփականը։ Նրա խոսքով՝ Aria-ն հրաժարվել է համագործակցել և դրա փոխարեն գործի նյութերը փոխանցել է դատախազներին։

Քլարկ շրջանի դատախազությունը Թոմսոնին գողության մեղադրանք է ներկայացրել։ Նա ձերբակալվել է օրդերով և վճարել 15,480 դոլար՝ կալանքից ազատվելու համար։ Հետագա քրեական հետապնդումից խուսափելու համար Թոմսոնը համաձայնել է փոխհատուցում վճարել, ինչից հետո մեղադրանքները հանվել են։

Հայցում Թոմսոնը պնդում է, որ իրեն կարող էին միտումնավոր թմրեցնել և որ խաղատան վերապատրաստված անձնակազմը պետք է նկատեր իր ոչ նորմալ վիճակը։ Օգնություն ցուցաբերելու փոխարեն, ըստ նրա վարկածի, խաղատունը թույլ է տվել իրեն շարունակել խաղը, այնուհետև ձերբակալել է իրեն և փորձել բռնագանձել խոշոր գումար այնպիսի գործողությունների հիման վրա, որոնց համար ինքը, իբր, գիտակցված համաձայնություն չի տվել

Հայցվորը խնդրում է դատարանին անվավեր ճանաչել 75 հազար դոլարի խաղային չեկերը, խաղատան վրա անփութության պատասխանատվություն դնել՝ անբարեխիղճ և խաբեբա գործելակերպի, անարդարացի հարստացման և չարամիտ հետապնդման համար, ինչպես նաև պատասխանատվության ենթարկել MGM Resorts ընկերությանը՝ որպես խաղատան սեփականատեր։ Նա պահանջում է ֆինանսական և բարոյական վնասի փոխհատուցում, ինչպես նաև դատական և այլ ծախսերի հատուցում։