Աննախադեպ թվով հնագիտական ​​գտածոներ են հայտնաբերվել 18-րդ դարում խորտակված «Սան Խոսե» գալեոնում

Կոլումբիայի ափերի մոտ «Նավաբեկությունների սրբազան գրալ» անունը ստացած 18-րդ դարի իսպանական գալեոնում նոր արտեֆակտներ են հայտնաբերվել, հայտնում է BBC-ն։

«Սան Խոսե» նավը պատկանել է իսպանական ռազմածովային նավատորմին և խորտակվել է բրիտանացիների կողմից 1708 թվականին Կոլումբիայի նավահանգստային Կարթագեն քաղաք մեկնելիս՝ բեռնված տոննաներով ոսկե և արծաթե մետաղադրամներով: Նավի խորտակման վայրը հայտնաբերվել է 2015 թվականին, սակայն առաջին ռոբոտացված հետազոտությունը սկսվել է միայն 2024 թվականի մայիսին։ Նավում գտնվող գանձերը գնահատվում են 16 միլիարդ ֆունտ ստեռլինգ: Հետազոտողներն ասում են, որ վերջին գտածոն «հնագիտական ​​վկայությունների աննախադեպ հավաքածու է ներկայացնում»:

«Այս հետազոտության արդյունքները բացահայտել են հնագիտական ​​վկայությունների աննախադեպ հավաքածու, որը զգալիորեն ընդլայնել է մեր գիտելիքները», - ասվում է նավաբեկության վայրի ուսումնասիրության համար պատասխանատու հաստատությունների հայտարարության մեջ:

Կոլումբիայի մարդաբանության և պատմության ինստիտուտի տնօրեն Ալյենա Կայսեդոն հայտարարել է, որ գալեոնում հայտնաբերվել են մի շարք նոր նյութեր, որոնք իրենք նախկինում չեն տեսել:

«Ի թիվս այլ բաների, փայտի կտորներ կամ նավի իրանի մասեր, առնվազն մնացորդներ, որոնք ցույց են տալիս, որ այնտեղ փայտ է եղել և հնարավոր խարիսխների հետքեր»,- ասել է նա: «Հայտնաբերված այլ իրերի թվում կան մեխեր, շշեր, տարաներ և որոշ այլ նյութեր, ինչպիսիք են ապակին և կերամիկան»:

Կոլումբիայի նախագահ Գուստավո Պետրոն առաջնահերթություն է դարձրել նավաբեկության վայրի վերականգնումը մինչև իր լիազորությունների ավարտը՝ 2026 թվականը։ Սակայն վեճերը շարունակվում են, թե ում է պատկանում գանձը: Իսպանիան պնդում է, որ «Սան Խոսեն» «պետական ​​նավ» է, քանի որ այն պատկանել է իսպանական նավատորմին, երբ խորտակվել է, և դրա պարունակությունը պաշտպանված է ՄԱԿ-ի բանաձևով, որին Կոլումբիան մասնակից չէ:

Բայց Կարա-կարա ցեղի բնիկ բոլիվացիները պնդում են, որ իրենցից գողացել են այդ հարստությունը։ Իսկ ԱՄՆ փրկարարական Sea Search Armada ընկերությունը հայց է ներկայացրել Կոլումբիայի դեմ ՄԱԿ-ի մշտական ​​արբիտրաժային դատարան՝ պահանջելով 7,8 միլիարդ ֆունտ ստեռլինգ այն պնդումների համար, որ նա առաջինն է հայտնաբերել նավը ավելի քան 40 տարի առաջ: