Թե ինչ է ստացել Ադրբեջանը 32 հայ գերիներին ազատ արձակելու դիմաց, մենք կիմանանք որոշ ժամանակ անց. Կիվիրյան

Թե ինչ է ստացել Ադրբեջանը 32 հայ գերիներին ազատ արձակելու դիմաց, մենք հավանաբար, կիմանանք որոշ ժամանակ անց. Ինքը ստացել է երկու հանցագործ ադրբեջանցու: Այս մասին NEWS.am -ի թղթակցի հետ զրույցում ասաց քաղաքական վերլուծաբան Արգիշտի Կիվիրյանը։

«Ադրբեջանն ստացել է այն, ինչը ուներ հայկական կողմը, հայկական կողմը այլ գերի չունի: Իսկ այդ երկու հանցագործներին վերադարձնելը ընտրություններից առաջ Ալիեւի համար մեծ նվեր է: Իրենք դեռ ունեն գերիների պաշար, որով կարող են երկար խաղալ եւ շատ բան պահանջել: Իսկ հայկական կողմն ուներ ընդամենը այս երկու հոգուն»,-ասաց նա:

Անդրդառնալով Հայաստան-Ադրբեջան ուղիղ երկխոսությանը, որն առաջարկում է Բաքուն, Կիվիրյանն ասաց. «Ուղիղ երկխոսությունը, իհարկե, դրական է հնչում, որովհետեւ եթե կան միջնորդներ, ապա նրանք իրենց կտորը պոկում են երկու կողմերից: Որպեսզի միջնորդներին ոչինչ չտաս, շատ լավ է ուղիղ բանակցություններ վարելը: Բայց ուղիղ բանակցությունները արդյունավետ են, երբ երկու կողմերի ուժերն իրար հավասար են: Երբ մի կողմը շատ թույլ է մյուսից, ո՞վ է երաշխավորելու, որ թույլ կողմի հետ ինչ պայմանավորվեցին, կատարվելու է: Միջնորդի դերը դրա մեջ է, նա կանգնում է երաշխավոր, պոկում է իր տոկոսը, փոխարենը երաշխավորում է պայմանավորվածությունների կատարումը: Հայկական կողմի թուլությունը թույլ չի տալիս իրեն արդյունավետ երկկողմ բանակցություններ վարել»,-ասաց քաղաքական վերլուծաբանը: