Տեղում ամեն ինչ շատ լավ է, դուք Երեւանում կոֆե խմեք ու քնեք
Կառավարության երեկվա նիստում Նիկոլ Փաշինյանը հրապարակային խոստովանեց, որ ստում էր մեկ շաբաթ առաջ, երբ Տեղ գյուղում մարտի 30-ին ադրբեջանցիների առաջխաղացումից հետո հայտարարեց, որ հայկական դիրքերի որեւէ փոփոխություն տեղի չի ունեցել։
Մարտի 30-ին Բաքուն հայտարարեց, թե Լաչինի նոր ճանապարհի շահագործման հետ կապված՝ ադրբեջանական զինուժը վերահսկողության տակ է վերցրել մի շարք բարձունքներ։
Նույն օրը կառավարության նիստի ժամանակ Փաշինյանը վստահեցրեց՝ հայկական դիրքերի որեւէ փոփոխություն տեղի չի ունեցել, ընդամենը Հայաստան-Արցախ երթուղու փոփոխություն է կատարվել։ Հայաստանի ազգային անվտանգության ծառայությունն ավելի ուշ հայտնեց, որ Հայաստան-Արցախ նոր՝ Կոռնիձոր-Տեղ ճանապարհի գործարկումից հետո ադրբեջանական ուժերն այդ հատվածի առնվազն 5 կետերում սահմանից 100-300 մետր առաջ են տեղակայվել։ Ավելի ուշ էլ փորձեց մեղմել իրավիճակը՝ տեղեկացնելով, որ սահմանի ճշգրտման աշխատանքների արդյունքում տվյալ հատվածում իրավիճակն էականորեն բարելավվել է՝ առանց հստակեցնելու, թե ինչի մասին է խոսքը։
Կառավարության երեկվա նիստում Փաշինյանը խոստովանեց, որ ադրբեջանցիները մտել են ՀՀ սուվերեն տարածք, բայցեւ, սովորության համաձայն, լղոզեց իրականությունը՝ փորձելով ցույց տալ, որ անցած մեկ շաբաթվա ընթացքում իշխանություններին հաջողվել է դրական արդյունքներ գրանցել։ «Որոշ տեղերում, ըստ հայկական կողմի մեր գնահատականի, ադրբեջանական կողմը դիրքավորվել էր եւ ինժեներական աշխտանքներ էր իրականացրել սահմանից 100-300 մետր առաջ Հայաստանի տարածքում: Դրանից հետո պայմանավորվածություն էր ձեռք բերվել, որ երկու կողմերի քարտեզագիրները ճշգրտեն իրավիճակը։ Այս ընթացքում սահմանապահների տեղակայման կետերի ճշգրտման ուղղությամբ աշխատանքներ են տարվել, եւ իրավիճակը որոշակիորեն բարելավվել է, մասնավորապես՝ 12 կմ-ից 7 կմ-ում տեղակայման կետերը հստակեցված են, 5 կմ-ի վերաբերյալ աշխատանքները շարունակվում են»։ Հայտարարեց նա՝ առանց մանրամասնելու, թե վերջապես ճշգրտումների արդյունքում ադրբեջանցիները նահանջե՞լ են, թե՞ շարունակում են մնալ նույն տեղում։ Գործադիրի ղեկավարն ընդամենը հույս հայտնեց, որ տեղակայման տեղերի ճշգրտման աշխատանքները կիրականացվեն կառուցողական մթնոլորտում։ «Մեր տրամադրվածությունը եղել է եւ շարունակում է մնալ իրավիճակի էսկալացիայից խուսափելը»,- ասաց Փաշինյանը՝ բացահայտ խոստովանելով, որ թեկուզ մի քանի կիլոմետր էլ ադրբեջանցիներն առաջ գան, չեն դիմադրելու՝ խուսափելով էսկալացիայի վտանգից։
Ի դեպ, անցած շաբաթ, երբ ԱԱԾ-ն հաղորդեց, թե իբր բանակցությունների արդյունքում «բարելավում» են արձանագրել, Տեղի ՏԻՄ իշխանության ներկայացուցիչներն ու բնակիչները շտապեցին հերքել՝ վստահեցնելով, որ ադրբեջանցիները մի միլիմետր էլ չեն նահանջել, ճիշտ հակառակը՝ առաջ եկած դիրքերում, այսինքն՝ գյուղացիների արտերում ու վարելահողերում, ակտիվ ինժեներական-ամրաշինական աշխատանքներ են իրականացնում՝ աշխատեցնելով ծանր տեխնիկա։
Շատ արագ տեղացիների առջեւ փակվեցին ադրբեջանցիների կողմից զավթված՝ իրենց այգիներ տանող ճանապարհները, ոստիկանական անցակետեր տեղադրվեցին Տեղ համայնքի փողոցներում, եւ մոտ մեկ շաբաթ է՝ ադրբեջանցիների զավթած տարածքին թույլատրում են մոտենալ բացառապես զինվորականների։ Ուստի նման պայմաններում Նիկոլ Փաշինյանն ինչ ուզի, այն էլ կասի, ինչպես ժողովրդական ասացվածքն է ասում՝ «գեղից մարդ չկա, գլուխ է գովում»։
Իրականում, թե որքան տարածք են ադրբեջանցիները զավթել ՀՀ սուվերեն տարածքի այդ հատվածից, դժվար է ասել, դա միայն իշխանությունները կարող են ճշգրիտ թվերով ներկայացնել, քանի որ GPS-ով, քարտեզներով պետք է հասկանալ, թե ադրբեջանցիների կողմից վերջերս զավթված այգիներն արդյո՞ք ամբողջությամբ եղել են ՀՀ սուվերեն տարածքում, թե՞ այդ չափագրումների արդյունքում կարող է պարզվել, որ ինչ-որ մի հատված պատկանել է Կուբաթլուին, որը պատերազմից հետո քաղաքական որոշման արդյունքում Փաշինյանը հանձնեց Ադրբեջանին։
Քանի դեռ պատկան մարմինները հստակ թվեր չեն ներկայացնում, ուժի մեջ են տեղացիների մոտավոր հաշվարկները, որ 60-80 հեկտար տարածք ենք կորցրել։
Պաշտպանության նախարարի խորհրդական, Սյունիքի նախկին մարզպետ Մելիքսեթ Պողոսյանը, որ ներկայումս ղեկավարում է նաեւ մարզի աշխարհազորը, հորդորում է՝ մտահոգվելու առիթներ չկան․ «Ամեն ինչ լավ է, շատ լավ է Տեղում, դուք Երեւանում հանգիստ կոֆե խմեք ու քնեք»: Քուններս չի տանում, թուրքը ձեր քթի տակ է, ո՞նց քնենք։ «Ըտենց էլ կինի, ընենց էլ կինի, հանգիստ եղեք»:
Իսկ ինչքա՞ն տարածք են զավթել։ «Դու կարծում ես՝ ես, լինելով զինվորական, պիտի բա՞ն ասեմ»: Լավ, գոնե ասեք` առաջին օրվա առաջխաղացումից հետո նահանջե՞լ են։ «Լավ եղեք»,- անդրդվելի մնաց Պողոսյանը։
Տեղ համայնքի ավագանու ընդդիմադիր անդամ Մասիս Զեյնալյանը գաղափար չունի, թե ինչ բարելավումների մասին են խոսում վարչապետն ու պատկան մարմինները, մի քանի օր առաջվա տվյալներով՝ ադրբեջանցիները մեկ տասնյակից ավելի դիրքեր էին դրել, իսկ հիմա իրենց թույլ չեն տալիս անգամ մոտ գնա այդ հատվածին, որ հասկանան՝ ինչ է կատարվում․ «Եթե մեզ չեն թողնում առաջ գնանք, ի՞նչ իմանանք՝ ինչի մասին են խոսում։ Հեռվից նույն բանն ա երեւում, բայց ես պիտի գնամ, իմ աչքով տեսնեմ, նոր ասեմ՝ փոխվե՞լ է, թե՞ չի փոխվել։ Հիմա հեռվից հա՛մ տեսնում եմ, հա՛մ լացում, ուրիշ բան անել չեմ կարող»։ Նշենք, որ ադրբեջանցիները զավթել են նաեւ Զեյնալյանի վարելահողը: Հետաքրքրվեցինք` համակերպվեցի՞ք, որ այն էլ ձերը չի լինելու։ «Ի՞նչ անենք, ասեք՝ անենք»։
Հայաստանում կենսաթոշակառուների համար նոր հնարավորություններ են բացվում
Շիրակցի դպրոցականները մեկնել են ամառային հանգստի՝ դեպի «Արագած» ճամբար
Իսպանիայի ընտրանու հարձակվողը վնասվածք ունի
Երևանում մի քանի փողոցներում կփոխվի երթևեկության կազմակերպումը
Անտարկտիդայում հայտնաբերված առաջին դինոզավրի ոսկորը գտել են դարակում
Գալուզինը կասկածի տակ է դնում եվրոպական շուկաների՝ Հայաստանի համար այլընտրանք լինելը
Մեծացել է ռուբլու առքի և վաճառքի տարբերությունը․ ի՞նչ վտանգներ կան բանկային համակարգի համար
Ոստիկանության գվարդիայի ծառայողներն ու համայնքային ոստիկանները թմրամիջոց պահելու դեպքեր են բացահայտե...
Արարատի մարզ Քաղցրաշեն գյուղում կաթնամթերքի արտադրամասի գործունեություն է կասեցվել
Թուրքիան արձագանքել է Իսրայելի կառավարության կողմից Հայոց ցեղասպանությունը ճանաչող բանաձևի հաստատման...