ԵՄ-ն ձգտում է Հայաստանի եւ Ադրբեջանի միջեւ «խաղաղության» սեփական էներգետիկ շահերի համա՞ր
Ադրբեջանի արտգործնախարար Ջեյհուն Բայրամովը հոկտեմբերի 26-ին հանդիպել է Բաքվում հավատարմագրված Եվրամիության անդամ երկրների դիվանագիտական ներկայացուցչությունների ղեկավարների հետ։ Այս մասին ասվում է Ադրբեջանի ԱԳՆ մամուլի ծառայության հաղորդագրության մեջ, որը տարածել են ադրբեջանական լրատվամիջոցները։
Ուղերձն ինքնին չափազանց հետաքրքիր է, այն բազմաթիվ եզրակացությունների տեղիք է տալիս։
Այսպես, հաղորդվում է, որ մտքերի փոխանակություն է տեղի ունեցել Ադրբեջանի եւ ԵՄ-ի միջեւ քաղաքական, տնտեսական, էներգետիկ, ներդրումային, կրթական եւ այլ ոլորտներում համագործակցության ընթացիկ օրակարգի, ինչպես նաեւ տարածաշրջանում տիրող իրավիճակի շուրջ։
Բայրամովը խոսել է Եվրոպայի էներգետիկ անվտանգության ապահովման եւ էներգամատակարարման դիվերսիֆիկացման գործում Ադրբեջանի դերի մասին։ Այս առումով ընդգծվել է այս տարվա հուլիսի 18-ին փոխըմբռնման հուշագրի ստորագրման կարեւորությունը, որը նախատեսում է դեպի ԵՄ գազի փոխադրման ծավալների կրկնապատկում, ինչպես նաեւ այլընտրանքային էներգիայի աղբյուրների զարգացման ոլորտում համագործակցության ընդլայնում։ Նախարարի խոսքով՝ «ազատագրված» տարածքներում առկա է էներգետիկ լայն ներուժ, եւ Ադրբեջանն արդեն մի շարք նախագծեր է իրականացնում այդ ներուժի արդյունավետ օգտագործման համար։ Բայրամովը նաեւ մատնանշել է ներդրումների եւ առեւտրի ոլորտում համագործակցության ներուժը։ Նա նաեւ նշել է Արեւելք-Արեւմուտք տրանսպորտային միջանցքի զարգացմանն ուղղված Ադրբեջանի ջանքերը։
«Այս համատեքստում Բայրամովը նշել է, որ տարածաշրջանում հաղորդակցությունների բացման ուղղությամբ Ադրբեջանի ձեռնարկած քայլերը, ներառյալ՝ Զանգեզուրի միջանցքի գործարկումը, հակասում են Հայաստանի ոչ կառուցողական դիրքորոշմանը։ Նախարարը ներկաներին տեղեկացրել է Ադրբեջանի եւ Հայաստանի միջեւ հարաբերությունների կարգավորման գործընթացների, խաղաղության պայմանագրի ստորագրման, տարածաշրջանում բնակվող հայ բնակչության վերաինտեգրմանն ուղղված քայլերի մասին»,-ասվում է հաղորդագրության մեջ։
Ի պատասխան՝ Ադրբեջանում ԵՄ պատվիրակության ղեկավար Պյոտր Միխալկոն նշել է, որ «բարձր մակարդակի շփումները կարեւոր դեր են խաղում համագործակցության զարգացման գործում։ Այս առումով վստահություն են հայտնել, որ Ադրբեջանի եւ Եվրամիության միջեւ նոր համաձայնագրի նախագծի շուտափույթ ավարտը կարեւոր ներդրում կունենա հարաբերությունների հետագա զարգացման գործում»։
Այս կապակցությամբ թարմացնենք Բաքվում ԵՄ ներկայացուցչության ղեկավրաի հիշողությունը՝
1.«Զանգեզուրի միջանցքը» ադրբեջանա-թուրքական ղեկավարության ֆանտազիան է, որը չունի փաստագրական կամ գոնե հրապարակային հիմքեր։
2.«Տարածաշրջանում բնակվող հայ բնակչության վերաինտեգրմանն ուղղված քայլերի մասին» խոսք լինել չի կարող։ Լեռնային Ղարաբաղի Հանրապետությունը անկախություն հռչակեց նույն հիմքերով, ինչ Ադրբեջանը, ԵՄ երկրները եւ ընդհանրապես աշխարհի բոլոր երկրները։ Միակ «քայլը», որը կարողանում է անել ադրբեջանական պետությունը, դա տարածաշրջանի հայ բնակչությանը երկրի երեսից ջնջելու փորձն է, ինչի մասին հայտարարեց այդ երկրի նախագահ Իլհամ Ալիեւը։
3.Եվրահանձնաժողովի նախագահի օրինակով ԵՄ դեսպանը որպես ճշմարտություն է ընդունում լապշան, որը ականջներից կախում է ադրբեջանցի նախարարը, խոսում Ադրբեջանի հետ համագործակցության մասին, բայց չի արտահայտում իր վերաբերմունքը Ադրբեջանի կողմից հայերի գերավարման, մշակութային ժառանգության ոչնչացման եւ տարածքների օկուպացման հանդեպ։ Ըստ էության, ԵՄ-ի ողջ «խաղաղության օրակարգի» նպատակն աադրբեջանական էներգետիկ ռեսուրսների անխոչընդոտ մուտքն է, իսկ Լեռնային Ղարաբաղի հակամարտությունը ոչ այլ ինչ է, քան տհաճ խոչընդոտ եվրոպացի պաշտոնյաների համար։