Ուղիղ 1 տարի առաջ Նիկոլին վարդի թերթերով դիմավորած Արագածավանում դժգոհություն է հասունանում․ ճանապարհներ, երկաթգիծ կփակեն

Ազգային ժողովը երեկ 2-րդ ընթերցմամբ և ամբողջությամբ ընդունեց «Հայաստանի Հանրապետության վարչատարածքային բաժանման մասին» օրենքում փոփոխություններ կատարելու մասին» ՀՀ օրենքի նախագիծը՝ կից փաթեթով։

Այդպիսով առաջիկայում արդեն իսկ միավորված 13 համայնք կրկին կմիավորվեն 5 համայնքային փնջում՝ ձևավորվելով որպես միավորված համայնքներ։

Մասնավորապես, Արագածոտնի մարզում՝ կխոշորացվի Թալին համայնքը, որի մեջ կմիավորվեն Թալին և Արագածավան համայնքները, Գեղարքունիքի մարզում՝ Ճամբարակ համայնքի մեջ կներառվեն Ճամբարակը և Շողակաթը, Լոռու մարզում՝ Ալավերդի համայնքը, որի մեջ կմիավորվեն Ալավերդին, Ախթալան, Օձունը և Շնողը, Լոռու մարզում՝ Տաշիր համայնքը, որը կներառի Տաշիրը, Մեծավանը և Սարչապետը, Սյունիքի մարզում՝ Սիսիան համայնքը, որը կներառի Սիսիանը և Գորայքը:

Այս որոշումը, սակայն, միանշանակ չի ընդունվել ընդամենը 6 ամիս առաջ արդեն մեկ անգամ խոշորացված համայնքներում, հատկապես Արագածոտնի մարզի Արագածավան համայնքում։ Ուղիղ 1 տարի առաջ՝ 2021 թվականի հունիսին՝ արտահերթ խորհրդարանական ընտրությունների քարոզարշավի ժամանակ, Նիկոլ Փաշինյանին վարդի թերթիկներով դիմավորած Արագածավանում դժգոհ են այս որոշումից, նրանց նաև դուր չի գալիս համայնքապետի թեկնածուն՝ Տավրոս Սափեյանը։

«Ախպեր ջան, մենք չե՛նք ուզում, որ Տավրոսը մեզ ղեկավար լինի։ Ինքը սկի իր Թալինի բնակիչների համար ընդունելի չի, ուր մնաց՝ Արագածավանում։ Տեսան, որ դեկտեմբերի ընտրությունների ժամանակ չկարողացավ համայնքապետ դառնա, հիմա որոշել են Արագածավանն էլ միացնեն, որ այստեղից էլ ձայներ կորզեն։ Չի՛ ստացվելու, մենք ինչքան էլ ժամանակին Նիկոլ ենք սատարել, հիմա դեմ ենք իրեն էլ, իր թիմին էլ։

Նիկոլին, թե՛ 2018-ին, թե՛ 2021-ին ջերմ ընդունել ենք, վարդի թերթեր էին շաղ տալիս վրան, գառ էին մորթում ոտքերի տակ, որ էսօր մեզ դեմ գնա՞։

Շատ բաներ կան, որոնց մասին այս պահին չենք բարձրաձայնում, բայց նույն Նիկոլը, Պապիկյան Սուրոն ու էլի մի քանիսը թող լավ հիշեն, թե ինչ խոստումներ էին տալիս ժողովրդին՝ հանձին Արագածավանի բնակիչների։ Ո՞ւր է իրենց խոստացած աշխատատեղերը․․․ էլ բան չասեմ»,- 168.am-ի հետ զրույցում ասաց Արագածավանի բնակիչներից մի կին։

Արագածավանի մեկ ուրիշ բնակիչ էլ, որ կրկին չցանկացավ ներկայանալ, որպեսզի չթիրախավորեն իրեն, ասաց, որ այս պահին համայնքի երիտասարդներով որոշում են, թե ինչպես կանխել արդեն իսկ օրենքի ուժ ստացած որոշումը․

«Ամեն հնարավոր ու անհնարին տարբերակ քննարկում ենք, ընդհուպ՝ քարոզարշավին իշխանության ներկայացուցիչներին արգելել մտնել մեր համայնք։ Բայց այս պահին ՔՊ-ն արդեն իսկ սկսել է աշխատանքներ տանել բնակիչների հետ, փորձում են ամեն մեկին անհատական մոտեցում ցույց տալ, մարդկանց թույլ տեղերը գիտեն՝ սոցիալական վիճակը, տարբեր խոստումներով փորձում են լռեցնել։ Չգիտենք, թե վերջն ի՞նչ է լինելու, բայց մենք մինչև վերջ պայքարելու ենք, որ Արագածավանը չխոշորացվի, ու Տավրոսն ու իր թիմն էլ մեր համայնք չմտնեն։ Ճանապարհ կփակենք, պետք լինի՝ երկաթգիծն էլ կփակենք․․․»,- ասաց մեր զրուցակիցը՝ հավելելով, որ առաջիկայում պատրաստվում են ՔՊ-ի մարզային թիմի և համայնքապետի պաշտոնակատարի մասին փաստեր հրապարակել, սակայն չակերտներ չբացեց։

Ի դեպ, դեռ անցյալ տարի ՏԻՄ ընտրություններից առաջ մամուլում բազմաթիվ հրապարակումներ եղան Սափեյան եղբայրների մասին: Թալինի համայնքապետի ներկա պաշտոնակատարը, «Հանրապետություն» կուսակցության անդամ, ապա ՀԱԿ-ին անդամագրված՝ ազատամարտիկներ Ժորա և Մկրտիչ Սափեյանների եղբորորդին է: Դեռ 2019թ. նոյեմբերի 7-ին Քարակերտ գյուղի «Թալին» ՋՕԸ-ում տեղի ունեցած միջադեպից հետո Սափեյանները մի քրեական պատմության մեջ էին։ Եղբայրներից մեկի որդին՝ Անդրանիկ Սափեյանը, նշանակվել էր Թալինի ՋՕ պետի տեղակալ, սակայն նշանակումից մեկ օր անց ՋՕ ընկերության գործադիր տնօրենի կողմնակիցների հետ քաշքշուկ, ծեծկռտուք էր եղել, ու քրեական գործ էր հարուցվել:

Ինչ վերաբերում է համայնքների խոշորացմանը, ապա դեռ 1 ամիս առաջ 168.am-ը գրել էր, որ Արագածավանի բնակիչները խոշորացման ծրագրի վերաբերյալ իրենց դժգոհությունն էին հայտնել՝ առանց նախապես հայտարարելու համայնք այցելած պաշտոնյաներին։ Իսկ որպես հակադարձում՝ Կառավարության պաշտոնյան պատասխանել էր․

«ՏԿԵ նախարարության աշխատակից Աշոտ Գիլոյանն ասել է՝ դե՛մ եք, ստորագրահավաք կազմակերպեք, իսկ երբ գյուղացիները հարցրել են, թե դա ի՞նչ կփոխի, պատասխանել է՝ ոչ մի բան, արդեն որոշված է, խոշորացվելու է։ Ասաց՝ ձեր ընտրած իշխանությունն է, ինչո՞ւ եք դժգոհում․․․ Գիլոյանը նաև հավելեց, որ խոշորացումն արդյունավետ ծրագիր է, և, որ Արագածավանը դրանից միայն շահելու է»,- ասել էր մեր զրուցակիցը։

Հիշեցնենք, որ Թալին խոշորացված համայնքում ՏԻՄ ընտրություններն անցկացվել էր ընդամենը 6 ամիս առաջ՝ 2021 թվականի դեկտեմբերի 5-ին։