Մոուրինյո․ Թիմում չկա ուժեղ բնավորությամբ խաղացող

«Ռոմայի» պորտուգալացի գլխավոր մարզիչ Ժոզե Մոուրինյոն Իտալիայի առաջնության 21-րդ տուրի տնային խաղում Թուրինի «Յուվենտուսից» կրած 3։4 հաշվով պարտությունից հետո դժգոհել է, որ իր ղեկավարած թիմում չկա ուժեղ բնավորությամբ խաղացող։

«Ինձ երեք տարի են տվել, որպեսզի թիմը բարելավի արդյունքները, բայց դրա համար ինձ պետք է ակումբի օգնությունը։ Երբ խաղադաշտում բարդ վիճակ է լինում, մեր խաղացողներից ոչ ոք չի դրսեւորում առաջատարի որակներ, չկա ուժեղ բնավորությամբ մեկը։

Այո, մենք կուժեղացնենք կազմը։ Մեյթլենդ-Նայլսից հետո կունենանք նաեւ ֆիզիկապես ամուր եւ բնավորություն ունեցող կիսապաշտպան։

Պետք է դուրս գալ կոմֆորտի գոտուց, որտեղ բավարարվում ենք 6-7-րդ տեղերով։ Ես արդեն ասել եմ խաղացողներին, որ նրանք պետք է հոգեբանության տեսանկյունից հասնեն ինձ, ես չեմ շարժվելու նրանց ուղղությամբ»,- Մոուրինյոյի խոսքը մեջբերում է Sky Sport Italia-ն։

Իտալիայի առաջնության հաջորդ տուրում «Ռոման» հունվարի 16-ին կընդունի «Կալյարիին»։

«Յուվենտուսը» 38 միավորով 5-րդ է, «Ռոման» 7-րդն է՝ 32 միավոր։